पुणे - रुग्णवाहिकांचे (Ambulance) सुधारित दर (Rate) शहरातील सर्व शासकीय (Government) आणि खासगी रुग्णालयांनी (Private Hospital) फ्लेक्सच्या (Flex) स्वरूपात रुग्णालयाच्या आवारात नागरिकांना (People) दिसतील अशा पद्धतीने लावावेत, असा आदेश प्रादेशिक परिवहन कार्यालयाने बुधवारी दिला. (Ambulance New Rate Declare by RTO Order)

प्रादेशिक परिवहन प्राधिकरणाने (आरटीओ) रुग्णवाहिकांचे दर नुकतेच निश्चित केले आहेत. त्या दरांची माहिती नागरिकांना व्हावी, यासाठी रुग्णालयांनी हे दरपत्रक ४ बाय ६ आकारात फ्लेक्स स्वरूपात दर्शनी भागात लावावेत, असे आदेशात म्हटले आहे. तसेच जादा दराने आकारणी झाल्यास नागरिकांनी rto.12-mh@gov.in किंवा homebranchpune@gmail.com वर संपर्क साधावा, असे आवाहन प्रादेशिक परिवहन अधिकारी अजित शिंदे यांनी केले आहे.

रुग्णवाहिकांना पहिल्या दोन तासांसाठी अथवा २५ किलोमीटर अंतरासाठी रुग्णवाहिकेच्या प्रकारानुसार ६०० ते ९५० रुपये दर निश्चित करण्यात आला आहे. त्यापुढील प्रत्येक किलोमीटरसाठी अनुक्रमे १२, १३ किंवा १४ रुपये दर निश्चित करण्यात आला आहे. तसेच प्रतीक्षा शुल्क प्रतितास १००, १२५ आणि १५० रुपये केले आहे.