बारामती : महिला व बाल कल्याण विभागाच्या माझी कन्या भाग्यश्री या योजनेचा लाभ मातापित्यांनी घ्यायला हवा, असे आवाहन बालविकास प्रकल्प अधिकारी अभिमान माने यांनी केले आहे.

हेही वाचा - आरटीईच्या २५ टक्के जागांवरील प्रवेशाची सोडत बुधवारी होणार जाहीर

एक किंवा दोन मुली झाल्यानंतर कुटुंब नियोजनाची शस्त्रक्रीया करुन घेणा-या दांपत्यासाठी ही योजना शासनाने आखली आहे. लिंग निवडीस प्रतिबंध व्हावा, स्त्री जन्मास प्रोत्साहन मिळावे मुलींचा आरोग्य व शैक्षणिक दर्जा सुधारणे, या बाबींसाठी शासन स्तरावरुन माझी कन्या भाग्यश्री या योजनेची निर्मिती झाली. 

या योजनेअंतर्गत मुलींच्या नावे 50 हजार रुपयांची ठेव अनामत रक्कम शासनाद्वारे बँक ऑफ महाराष्ट्र मध्ये ठेवली जाते. मुलगी अठरा वर्षांची झाल्यानंतर सदरची रक्कम मुद्दल व व्याजासह संबंधित मुलीला मिळते. या योजनेचा फायदा घेण्यासाठी खालील बाबींची पूर्तता करणे आवश्यक आहे. या संदर्भात अधिक माहितीसाठी पंचायत समितीतील बाल विकास प्रकल्प अधिका-यांशी संपर्क साधण्याचे आवाहन करण्यात आले आहे. बारामती तालुक्यात या योजनेसाठी आतापर्यंत बारा प्रस्ताव दाखल झाले होते त्या पैकी अकरा प्रस्ताव मंजूर झाल्याची माहिती बाल विकास प्रकल्प अधिकारी अभिमान माने यांनी दिली. 

हेही वाचा - पुणे विद्यापीठातील विशेष प्राध्यापकांची नियुक्ती रद्द करा; कुलगुरूंकडे मागणी

• माता किंवा पित्याने एक किंवा दोन मुली झाल्यानंतर कुटुंब नियोजन शस्त्रक्रिया केली असावी तसा दाखला दाखला गरजेचा.
•मुलीचा जन्माचा दाखला व आधारकार्ड.
•वडीलांचे वार्षिक उत्पन्न साडेसात लाखांहून कमी असले पाहिजे. उत्पन्नाचा दाखला आवश्यक.
•वडीलांचे डोमासाईल सर्टीफिकेट  आवश्यक.
•आई व मुलीचे बँक ऑफ महाराष्ट्रमध्ये संयुक्त खाते आवश्यक.

(संपादन : सागर डी. शेलार)