पुणे - लष्करे तैयबा दहशतवादी संघटनेशी संबंध असल्याच्या संशयावरून राज्य दहशतवाद विरोधी पथकाने (एटीएस) दापोडीतून अटक केलेल्या जुनैद महंमद याचा साथीदार आफताब हुसैन शाह (वय २८, रा. किश्‍तवार, जम्मू आणि काश्मीर) याला काश्मीर येथे अटक करण्यात आली होती. सदर दोघांना विशेष सत्र न्यायाधीश सत्यनारायण नावंदर यांच्या न्यायालयात शुक्रवारी हजर करण्यात आले. न्यायालयाने जुनेद यास सात जून तर आफताब यास १४ जून पर्यंत पोलीस कोठडीत ठेवण्याचे आदेश दिले आहे. जुनेद याच्या पोलीस तपासात त्याचाकडे १५ फेसबुक खाती, सात व्हॉटसअप खाती आणि ११ सिमकार्ड मिळून आली आहे. सदर खात्यात शेकडो लोक सहभागी असून त्यांच्याकडे तपास कारवायांचा आहे अशी माहिती एटीएसने न्यायालयात दिली आहे.

शाह हा जुनैद आणि लष्करे तैयबा यांच्यातील महत्त्वाचा दुवा असल्याचा पोलिसांना संशय आहे. जुनैदला मागच्या महिन्यात अटक केल्यानंतर एटीएसच्या पथकांनी कारगील, गंधरबल, श्रीनगर परिसरातील विविध ठिकाणी स्थानिक पोलिसांच्या समन्वयाने शोध मोहीम राबवली. या तपास पथकाने श्रीनगरपासून २९१ किलोमीटर अंतरावर असलेल्या किश्‍तवार या ठिकाणी आफताबला ताब्यात घेतले. आफताबला स्थानिक न्यायालयात हजर केले असता न्यायाल्याने त्यास तीन दिवसांची ट्रान्झिट रिमांड मंजूर करून एटीएसच्या ताब्यात दिले.