पुणे : मित्रासमवेत नदीच्या घाटावर गप्पा मारत बसलेल्या तरुणावर चौघांनी कोयत्याने वार करीत जीवघेणा हल्ला केला. या हल्ल्यात तरुणी गंभीर जखमी झाला आहे. तर आरोपींनी त्याच्या मित्रालाही लाथाबुक्‍क्‍यांनी मारले. ही घटना औंध येथील नदीपात्रातील घाटावर रविवारी रात्री साडे दहा वाजण्याच्या सुमारास घडली. हा हल्ला पूर्ववैमनस्यातून झाला असण्याची शक्यता पोलिसांनी व्यक्त केली आहे.

पुण्याच्या बातम्या वाचण्यासाठी येथे ► क्लिक करा

आकाश रमेश अडाळे (वय 22, रा.आंबेडकर वसाहत, डीपी रोड, औंध) असे या हल्ल्यात जखमी झालेल्या तरुणाचे नाव आहे. याप्रकरणी रणजीत नागावडे, सनी दिवे, सुमीत खरात व त्यांचा एक साथीदार (सर्व रा. औंधगाव) अशा चौघांविरुद्ध चतुःश्रृंगी पोलिस ठाण्यात खुनाचा प्रयत्न केल्याचा गुन्हा दाखल झाला आहे.

पुण्यात पाणीपुरवठ्याचे तीन-तेरा; पालिकेचा अजब कारभार, पेठांमध्येही टंचाई

पोलिसांनी दिलेल्या माहितीनुसार, फिर्यादी अडाळे हा रविवारी रात्री जेवण झाल्यानंतर त्याचा मित्र संतोष काळे याच्यासमवेत रात्री साडे दहा वाजता औंध येथील नदीपात्रातील घाटावर गप्पा मारत बसला होता. त्यावेळी चारही आरोपी तेथे आले, त्यांनी फिर्यादीस शिवीगाळ करीत मारहाण करण्यास सुरूवात केली. त्यानंतर सनी दिवे याने त्याच्या हातातील कोयत्याने फिर्यादीच्या डोक्‍यात समोरुन वार केला. त्यानंतर पुन्हा डोक्‍यात कोयता मारण्यासाठी उचलला, त्यावेळी फिर्यादी यांनी त्यांच्या हाताने वार अडविण्याचा प्रयत्न केला. तेव्हा फिर्यादीच्या डाव्या हाताच्या पंजावर कोयत्याचा वार बसला. त्यानंतर रणजित नागावडे याने फिर्यादीच्या पायांवर कोयत्याने वार करुन त्यांना गंभीर जखमी केले. या हल्ल्यात फिर्यादी गंभीर जखमी झाले. त्याचबरोबर आरोपींनी फिर्यादीचा मित्र संतोष काळे यालाही लाथाबुक्‍क्‍यांनी जोरदार मारहाण केली. त्यानंतर आरोपींनी मोठमोठ्या ओरडत व कोयते हवेत फिरवुन दहशत निर्माण करण्याचा प्रयत्न केला. या घटनेनंतर चतुःश्रृंगी पोलिस ठाण्याचे वरिष्ठ पोलिस निरीक्षक अनिल शेवाळे, पोलिस निरीक्षक (गुन्हे) विजय लांबतुरे यांनी घटनास्थळी भेट देऊन पाहणी केली.