Latest sugarcane news: आंबेगाव येथील भीमाशंकर सहकारी साखर कारखान्याने ऊस उत्पादक शेतक-यांच्या ऊसाला जास्तीचा दर देण्याची परंपरा कायम राखत मागील सन २०२३-२४ गाळप हंगामात गाळप केलेल्या ऊसासाठी अंतिम ऊस दर प्रती मेट्रिक टनासाठी ३२०० रुपये जाहीर केला असल्याची माहीती कारखान्याचे अध्यक्ष बाळासाहेब बेंडे यांनी दिली.

भीमाशंकर कारखान्याचे संस्थापक-संचालक व राज्याचे सहकारमंत्री दिलीप वळसे पाटील यांच्या मार्गदर्शनाखाली संचालक मंडळाने घेतलेल्या निर्णयानुसार सन २०२३-२४ गाळप हंगामात कार्यक्षेत्र व परिसरातील गाळप केलेल्या संपूर्ण ११ लाख नऊ हजार ४६८ मेट्रिक टन ऊसासाठी कारखान्याने एफ.आर.पी. नुसार २७९०.१० रुपये प्रती मेट्रिक टन दर येत असतानाही यापूर्वी २९५० रुपये प्रती मेट्रिक टनाप्रमाणे रक्कम एकूण रक्कम ३२७ कोटी २९ लाख ३० हजार रुपये एकरक्कमी ऊस उत्पादक शेतक-यांना अदा केलेली आहे.

याशिवाय १.८३ लाख मेट्रिक टन खोडवा उसासाठी १०० रुपये प्रती मेट्रिक टनाप्रमाणे रक्कम ऊस उत्पादक शेतक-यांना अदा केली आहे. ऊस तोडणी व वाहतूक दरामध्ये झालेल्या वाढीमुळे ऊस तोडणी व वाहतूक खर्चात १३७ रुपये प्रती मेट्रिक टन वाढ होवूनही ३२०० रुपये प्रती मेट्रिक टन अंतिम ऊस दर जाहीर केलेला आहे. अंतिम हप्ताची रक्कम ऊस उत्पादक शेतक-यांचे बँक खात्यावर दिवाळी सणापूर्वी वर्ग करण्यात येणार आहे.

कारखान्याने यापूर्वी एफ.आर.पी. पेक्षा जास्त दर व खोडवा अनुदान वेळेतच अदा केलेले आहे. त्याशिवाय एफ.आर.पी. पेक्षा जास्त दर अदा केलेला असूनही दरवर्षीप्रमाणे दिवाळीसाठी अंतिम हप्त्याचे स्वरुपात ऊस उत्पादक शेतक-यांना अदा करण्याचे निश्चित केले आहे. त्यामुळे ऊस उत्पादक शेतक-यांची दिवाळी गोड होणार असल्याने आनंदाचे वातावरण आहे.

भीमाशंकर कारखान्याने नेहमीच ऊस उत्पादक शेतक-यांना जास्तीचा दर दिलेला असून यापुढेही हि परंपरा कायम राहील. तरी गाळप हंगाम २०२४-२५ करीता कार्यक्षेत्र व परिसरातील सर्व ऊस उत्पादक शेतक-यांनी भीमाशंकर कारखान्यास आपला ऊस देवून पुर्वीप्रमाणेच सहकार्याची भावना ठेवावी अशी विनंती कारखान्याचे उपाध्यक्ष प्रदीप वळसे पाटील यांनी केले.