भोर - मराठा आरक्षणासाठी झालेल्या लढ्यामुळे राज्यभरात शासनाने मराठ्यांच्या कुणबीच्या नोंदी रेकॉर्ड शोधण्याची मोहिम सुरु केली आहे. महसूल विभागाच्या भोर उपविभागातील भोर आणि वेल्हे तालुक्यात कुणबीचे रेकॉर्ड शोधण्यासाठी प्रशासनाने ताकद पणाला लावली आहे. भोरचे उपविभागीय अधिकारी राजेंद्र कचरे यांनी सुट्टीच्या दिवशीही रेकॉर्ड शोधण्याचे काम सुरु ठेवले आहे.

शनिवारी (ता.४) रेकॉर्ड रुममध्ये १८८८ सालातील तत्कालीन भोर संस्थान मधील राजगड तालुक्यातील कुणबीचे पुरावे हाती लागले आहेत. हे पुरावे मो़ड़ी लिपीत असून तज्ञ व्यक्तीकडून त्याची खात्री करण्यात येत आहे. आजपर्यंत १८८८ सालातील तालुक्याच्या अतीदुर्गम भागातील साळुंगण गावचे कुणबीच्या नोंदी असलेले रेकॉर्ड, १९०५ सालातील शिवरे गावचे रेकॉर्ड़ आणि १९४५-४६ सालातील वीसगाव खो-यातील वरोडी ब्रु गावचे रेकॉर्ड आढळून आले आहेत.

कुणबी जातीच्या दाखल्यांसाठी अर्जे केलेल्या नागरिकांच्या अर्जावर तातडीने निर्णय देण्यात येत असल्याचेही प्रांताधिकारी राजेंद्र कचरे यांनी सांगितले. जानेवारी महिन्यापासून आजपर्यंत भोर आणि वेल्हे तालुक्यातील १ हजार ७४ जणांनी कुणवी दाखल्यांसाठी अर्ज केलेले आहेत. त्यापैकी १ हजार ३० जणांना दाखले देण्यात आले आहेत.

केवळ १२ जणांना दाखले नाकारण्यात आले असून ३२ जणांच्या अर्जावर अद्याप निकाल देण्यात आलेला नसल्याचे प्रांताधिकारी राजेंद्र कचरे यांनी सांगितले. भोर तालुक्यातील कुणबी दाखल्यांसाठी अर्ज दाखल केलेल्या ७१० व्यक्तींपैकी ६९५ जणांना दाखले देण्यात आले असून २५ जणांच्या अर्ज अद्याप प्रलंबीत आहेत.

वेल्हे तालुक्यात अर्ज दाखल केलेल्या ३६४ जणांपैकी ३५४ जणांना दाखले देण्यात आले असून १२ जणांचे अर्ज नामजूर केले आहेत. तर ७ जणांचे अर्ज प्रलंबीत आहेत.

काही वर्षांपूर्वी पंचायत समितीची इमारत जळाल्यामुळे महसूल विभागाचे रेकॉर्डही जळीत झाले आहे. यामध्ये सर्वाधिक रेकॉर्ड हे किकवी आणि निगुडघर मंडलातील आहेत. ज्या गावचे रेकॉर्ड जळालले आहे. त्या गावातील नागरिकांनी त्यांच्याकडे असलेले रेकॉर्ड महसूल विभागाकडे जमा करावे. त्याची खातरजमा व तपासणी करून संबंधीत नागरिकांना कुणबीचे दाखले देण्यात येणार असल्याचे प्रांताधिकारी राजेंद्र कचरे यांनी सांगितले.