मंचर : “कोरोना विषाणूंचा प्रादुर्भाव रोखण्यासाठी लॉकडाऊन सुरू झाल्याचा फटका शेतीमालाला मोठ्या प्रमाणात बसला आहे. मंचर येथे बाजार समिती एक महिन्यापासून बंद आहे. त्यामुळे एकूण २५ कोटी रुपयांची होणारी शेती मालाची आर्थिक उलाढाल पूर्णपणे थांबली असून त्याची आर्थिक झळ शेतकऱ्यांना सहन करावी लागत आहे.” अशी माहिती आंबेगाव तालुका कृषी उत्पन्न बाजार समिती चे सभापती देवदत्त निकम यांनी दिली.

- ताज्या बातम्यांसाठी डाऊनलोड करा ई-सकाळचे ऍप

“आंबेगाव तालुका कृषी उत्पन्न बाजार समितीचे मंचर हे मुख्यालय आहे. येथे आंबेगाव प्रमाणे शिरूर, जुन्नर, खेड तालुक्यातील काही गावातून तरकारी, भाजीपाला, कांदा, बटाटा विक्रीसाठी येतो. येथील शेतीमाल प्रामुख्याने अडत्या मार्फत पुणे-मुंबई, सुरत व दक्षिण भारतामध्ये मालट्रक द्वारे पाठविला जातो. पण जवळपास सर्वच बाजार समितीतील व्यवहार बंद असल्याने तसेच वाहतूकही ही बंद आहे. उत्पादित शेतीमाल खरेदीसाठी खरीदार नसल्याने व मजुरी भागत नसल्याने नाईलाजास्तव भाजीपाला टोमॅटो व तरकारी मालात शेतकऱ्यांनी गुरे सोडल्याच्या घटना घडलेल्या आहेत.

- Coronavirus : जिथून सुरुवात झाली तिथे होतोय शेवट

काही शेतकऱ्यांनी कांदा चाळीत साठवून ठेवलेला आहे. उन्हाळ्याचे दिवस असल्यामुळे तापमान वाढत असल्याने कांदा सडून जात आहे. जुलै-ऑगस्टमध्ये झालेली अतिवृष्टी तसेच कांद्याची निर्यातही केंद्र सरकारने काही काळ थांबवली होती. या संकटातून शेतकरीवर्ग सावरत असतानाच कोरोनाचे महाभयंकर संकट आले. या संकटामुळे शेतकरी आर्थिक संकटात सापडला आहे. पीक कर्जाचे हप्ते भरता येणार नाहीत. अशी परिस्थिती सध्या निर्माण झाली आहे.” असे निरगुडसर येथील प्रगत शेतकरी व उपसरपंच दादाभाऊ टाव्हरे यांनी सांगितले. 

- पुणे शहर पोलीस दलातील ते पोलिस दांपत्य झाले कोरोनामुक्त!

“मंचर बाजार समितीतून दररोज ७५ लाख रुपये किमतीचा तरकारी व भाजीपाला विक्रीसाठी नवी मुंबई, पुणे, कल्याण व परराज्यात पाठविला जात होता. पण तब्बल एक महिना बाजार समितीतील व्यवहारबंद आहेत. हमाल मापाडी यांचाही रोजगार बुडाल्याने त्यांच्यापुढे उदरनिर्वाहाचे मोठे संकट उभे राहिले आहे. उद्योग व्यवसाय या प्रमाणेच शेतकऱ्यांनाही राज्य शासनाने नुकसान भरपाईचे पॅकेज द्यावे.” अशी मागणी शेतकरी वर्गातून केली जात आहे.