कोथरुड : कोरोनाची लक्षणे दिसत नसलेल्या पण घरी क्वॉरंटाईन होण्यास अडचण असलेल्या ज्या नागरिकांची शिफारस महानगरपालिका करेल, अशा नागरिकांच्या पाच दिवस निवास आणि भोजनाची व्यवस्था आम्ही विनामूल्य करू. त्यासाठी शंभर खोल्यांचे हॉटेल आरक्षित केल्याची माहिती भाजप प्रदेशाध्यक्ष आणि कोथरुडचे आमदार चंद्रकांत पाटील यांनी दिली.

- कोरोनाला रोखण्यासाठी उपमुख्यमंत्र्यांनी कसली कंबर; आणखी चार आयएएस अधिकारी केले तैनात!​

किष्किंधानगर या कंटेनमेंट परिसरात प्रतिकारशक्ती वाढविणाऱ्या होमिओपॅथी गोळ्यांचे वाटप करताना पाटील बोलत होते. पुणे महानगरपालिकेचे सभागृह नेते धीरज घाटे, नगरसेविका छाया मारणे, डॉ. संदीप बुटाला, पुनीत जोशी, माजी नगरसेवक दिलीप उंबरकर, अजय मारणे, अनिता तलाठी, सुरेखा जगताप, अॅड. रुपेश भोसले, रणजित हगवणे आदी यावेळी उपस्थित होते.

- पुण्यात नक्की चाललंय तरी काय; उपचाराअभावी तडफडताहेत कोरोना रुग्ण!​

पाटील म्हणाले की, कोवीड केअर सेंटर नावाने सुरु करत असलेल्या या हॉटेलात ज्यांची घरे लहान आहेत, अशा रुग्णांना राहण्याची सोय होईल. पुण्यामध्ये २५ जुलैपर्यंत कोरोना रुग्णांच्या संख्येचा आलेख चढता राहील. त्यानंतर मात्र ही संख्या कमी होत जाईल.

- पुण्याच्या बातम्या वाचण्यासाठी येथे क्लिक करा

कंटेन्मेंट परिसरात आयोजित केलेल्या या कार्यक्रमात प्रतिकार शक्ती वाढविण्यासाठीच्या गोळ्या वाटप केल्या असल्या तरी सोशल डिस्टन्सिंग राखण्यास सर्वचजण विसरल्याचे चित्र दिसत होते. पुण्यात कोरोना रुग्णांची संख्या झपाट्याने वाढत असताना गोळ्या वाटण्यासारखे हे सार्वजनिक कार्यक्रम कोरोनाविरुद्धच्या सराकारी लढ्यात अडथळा तर ठरत नाही ना? याचे आत्मपरिक्षण राजकीय नेत्यांनी करणे आवश्यक आहे. फक्त भाजपच नव्हे, तर इतर राजकीय पक्ष आयोजित करत असलेल्या कार्यक्रमातही असेच घडत असल्याने सर्वांनी खबरदारी घ्यावी, अशी भावना कोथरुडमधील सुजाण नागरीक व्यक्त करत आहेत.

- ताज्या बातम्यांसाठी डाऊनलोड करा ई-सकाळचे ऍप