पुणे : रोजगार म्हटले की, 'कौशल्य विकास' हा शब्द ओघानेच येतोच, ती काळाची गरजही आहे. हे महत्त्व ओळखून डेक्कन एज्युकेशन सोसायटीच्या बृहन महाराष्ट्र वाणिज्य महाविद्यालयाने (बीएमसीसी) यंदापासून कौशल्य विकासावर आधारित 'बॅचलर ऑफ मॅनेजमेंट स्टडीज' (बीएमएस) (ई-कॉमर्स ऑपरेशन्स) हा तीन वर्षाचा पदवी अभ्यासक्रम सुरू केला आहे. यामध्ये शेवटच्या वर्षात उद्योग समूहामध्ये इंटर्नशिप करण्याची संधी मिळणार आहे.

- शिक्षकांच्या बदल्या होणार, पण...; काय म्हणाले हसन मुश्रीफ?​

सावित्रीबाई फुले पुणे विद्यापीठाअंतर्गत अशा प्रकारचा अभ्यासक्रम सुरू करणारे 'बीएमसीसी' हे पहिलेच महाविद्यालय आहे. या अभ्यासक्रमात कौशल्यविकास आणि वाणिज्य शाखांवर आधारित प्रत्येकी १५ विषय आणि व्यवस्थापन शाखेवर आधारित ३ विषयांचा समावेश असेल, या अभ्यासक्रमातून विद्यार्थ्यांना उद्योग, रोजगार आणि स्वयंरोजगाराच्या संधी उपलब्ध होणार आहेत, असे महाविद्यालयाचे प्राचार्य डॉ. चंद्रकांत रावळ यांनी सांगितले. 

- सरळ सेवा भरतीची प्रक्रिया लवकरच सुरू होणार? अधिकारी काय म्हणाले पाहा​

अभ्यासक्रमासाठी बीएमसीसीने लॉजिस्टिक सेक्‍टर स्किल कौन्सिलसोबत (एलएसएससी) सामंजस्य करार केला आहे. त्याद्वारे प्रवेश घेणाऱ्या विद्यार्थ्यांची इंटर्नशिपची व्यवस्था करता येणार आहे. केंद्रीय कौशल्य विकास व उद्योजकता विभागाने स्किल इंडिया कॉर्पोरेशन ऑफ इंडियासोबत एलएसएससीची स्थापना केली होती. प्रवेशासाठी सर्व माहिती आणि नमुना अर्ज महाविद्यालयाच्या संकेतस्थळावर उपलब्ध आहे, असे महाविद्यालय विकास समितीचे अध्यक्ष सागर फडके यांनी सांगितले. डॉ. वर्षा देशपांडे या अभ्यासक्रमाच्या समन्वयिका आहेत.

- पुण्याच्या बातम्या वाचण्यासाठी येथे ► क्लिक करा

(Edited by Ashish N. Kadam)