दौंड : दौंड शहरातील जुने सोनार सतीश आंबुडकर यांचा मृतदेह दोन दिवस घरातील खूर्चीवरच असल्याची बाब समोर आली आहे. शेजाऱ्यांनी दार वाजवून देखील प्रतिसाद न दिल्याने कुटुंबीयांशी संपर्क साधल्यानंतर हा प्रकार उघड झाला. दौंड पोलिस ठाण्याचे हवालदार मारूती हिरवे यांनी याबाबत माहिती दिली. सोनार असलेले सतीश आनंदराज आंबुडकर ( वय ७८, रा. वृंदावन अपार्टमेंट, नेने चाळ, दौंड ) यांचे भारतरत्न डॅा. बाबासाहेब आंबेडकर चौकात दुकान होते परंतु वार्धक्यामुळे त्यांनी ते बंद केले होते.

हेही वाचा - आरटीईच्या २५ टक्के जागांवरील प्रवेशाची सोडत बुधवारी होणार जाहीर

त्यांच्या पत्नी मागील चार महिन्यांपासून औषधोपचारासाठी मोहोळ (जि. सोलापूर) येथे राहत असल्याने ते नेने चाळीतील सदनिकेत एकटेच राहत होते. सतीश आंबुडकर यांचा सदनिकेचा दरवाजा दोन दिवसापासून आतून बंद असल्याने व ते प्रतिसाद देत नसल्याने शेजाऱ्यांनी त्यांच्या कुटुंबीयांशी संपर्क साधला. ५ एप्रिल रोजी दुपारी त्यांच्या पत्नी लतिका दौंड येथे नातेवाईकासह आल्यावर सतीश आंबुडकर हे खूर्चीवर मृतावस्थेत आढळले. दुर्गंधी पसरल्याने पोलिसांनीच त्यांचा मृतदेह उचलून विच्छेदनासाठी रवाना केला. दौंड पोलिस ठाण्यात या बाबत लतिका सतीश आंबुडकर (वय ७० ) यांनी दिलेल्या माहितीनुसार अकस्मात मृत्यू म्हणून नोंद करण्यात आली आहे.