- राजेश कणसे

आळेफाटा - राजुरी, (Rajuri) उंचखडक (Uanchkhadak) (ता. जुन्नर) येथील श्री भैरवनाथ देवस्थान उंचखडक, राजुरी हे राजुरी व पंचक्रोशीतील भाविकांचे कुलदैवत व श्रद्धास्थान आहे. श्री भैरवनाथ हे जागृत देवस्थान म्हणून परिचित आहे. उत्तर पुणे जिल्ह्यातील सुप्रसिद्ध बैलगाडीच्या शर्यती (Bullockcart Competition) यात्रोत्सवाच्या वेळी आयोजित केल्या जातात. यात्रेचे हे ७८ वे वर्ष असून उत्तर पुणे जिल्ह्यातील बैलगाडा स्पर्धा असलेली सर्वात मोठी यात्रा या ठिकाणी भरते.

सर्वोच्च न्यायालयाच्या आदेशानंतर जवळपास आठ ते नऊ वर्षांनी प्रथमत:च बैलगाड्याच्या शर्यतीचे आयोजन होत आहे. घालून दिलेल्या सर्व मार्गदर्शक सूचना नियम व अटींचे पालन करून या वर्षी दि.१७ व १८ मार्च रोजी यात्रोत्सवाचे व बैलगाडा शर्यतीचे आयोजन केले जाणार आहे. यासाठी प्रथम क्रमांकाच्या गाड्यास १,००,००० रु., द्वितीय क्रमांकाच्या बैलगाड्यास ७५,०००, तृतीय क्रमांकाच्या बैलगाड्यास ५०,०००, चतुर्थ क्रमांकाच्या बैलगाड्यास २५,००० बक्षीस ठेवण्यात आले आहे.

तसेच प्रथम द्वितीय तृतीय व चतुर्थ क्रमांकाच्या फळी फोड गाड्यास प्रत्येक दिवशी अनुक्रमे ११,१११, ७,०००, ५,०००, ३,००० अशी पारितोषिक ठेवण्यात आली आहेत. त्यांनतर प्रत्येक दिवसाच्या फायनलसाठी प्रथम द्वितीय व तृतीय क्रमांकाच्या गाड्यांसाठी १५,१५०, ७,५०० व ५,५०० अशी पारितोषिक ठेवण्यात आली आहेत. दोन्ही दिवसांसाठी घाटाचा राजा साठी ११,१११ रुपयांची पारितोषिक ठेवण्यात आली आहेत. सर्वोच्च न्यायालयाच्या निर्णयानंतर मोठ्या उत्साहात आणि दिमाखात राजुरी आणि उंचखडक ग्रामस्थ उत्स्फूर्त सहभाग घेऊन हा यात्रोत्सव संपन्न करत आहेत.

पुणे जिल्ह्यातील हा बैलगाडा शर्यतींचा सर्वात मोठी यात्रा असून या ठिकाणी अहमदनगर, नाशिक, ठाणे या ठिकाणाहून अनेक बैलगाडा या ठिकाणी येत असतात. या बैलगाडा शर्यतीचे टोकन रविवार दि. १३ मार्च रोजी सकाळी ठीक १० वाजता भैरवनाथ सभागृह उंचखडक, ता. जुन्नर, जि. पुणे येथे रु ३०० फी घेऊन दिले जाणार आहे. अशी माहिती भैरवनाथ देवस्थान ट्रस्टचे अध्यक्ष संजय हाडवळे व सचिव सयाजी हाडवळे यांनी दिली.