पिंपरी : न्यायालयात वाहन नेत असताना विचारपूस करीत रजिस्टरमध्ये नोंद करण्यास  सांगितल्याने वकिलाने दोन पोलिसांना शिविगाळ करीत जिवे मारण्याची धमकी दिली. ही घटना शुक्रवारी दुपारी पिंपरी न्यायालयात घडली. पिंपरी चिंचवडमध्ये पोलिसांवरील हल्ल्याच्या घटनांमध्ये वाढ होत असून, अशातच शुक्रवारी आणखी एक घटना घडली. 

- 'या' २० मार्गांवर बस सुरू करता येईल; पीएमपीचा महापालिकेसमोर प्रस्ताव!

निलेश चौधरी (रा. मधुबन सोसायटी, सांगवी ) असे गुन्हा दाखल झालेल्या वकिलाचे नाव आहे. या प्रकरणी संदीप मारुती बर्गे या पोलिस कर्मचाऱ्याने फिर्याद दिली आहे. शुक्रवारी दुपारी दोनच्या सुमारास चौधरी त्याची दुचाकी घेऊन न्यायालयाच्या आवारातील पार्किंगमध्ये आला. त्यावेळी बर्गे त्याला म्हणाले, पूर्णवेळ न्यायालयात थांबायचे असेल तरच गाडी पार्किंगमध्ये लावा अन्यथा गेटच्या बाहेर उभी करा.

मात्र, चौधरी याने काहीही न ऐकता दुचाकी तेथेच उभी केली. त्यानंतर फिर्यादी बर्गे यांनी  प्रवेशद्वारावरील रजिस्टरमध्ये नाव व मोबाईल नंबर नोंद करण्यास  सांगितले .मात्र , त्यासही त्यांनी नकार दिल्याने फिर्यादीने देखील चौधरीला आत जाण्यापासून अडविले. त्यामुळे चौधरी याने त्यांना शिवीगाळ करीत अंगावर धावून गेला. तसेच दुचाकीवरुन जात असताना फिर्यादीसह हवालदार साबळे यांना पुन्हा शिवीगाळ केली. तसेच तुम्हाला उद्यापर्यंत जिवंत ठेवणार नाही अशी धमकी देत सरकारी कामात अडथळा निर्माण केला. 

- 'आरटीई'ची दुसरी सोडत जाहीर करा, अन्यथा...; मनसे विद्यार्थी संघटनेने दिला इशारा!

दरम्यान, पिंपरी चिंचवडमध्ये पोलिसांवरील हल्ल्याचे सत्र थांबत नसल्याचे दिसून येत आहे. आजची महिनाभरातील ही सातवी घटना आहे. पोलिसांवर होत असलेल्या सततच्या हल्ल्यामुळे नागरिकांच्या सुरक्षिततेसाठी असलेले पोलिसांचीच सुरक्षा धोक्यात आल्याचे दिसून येत आहे. मागील महिनाभरात काळेवाडी, बोपखेल, दापोडी, कुडळवाडी , चिंचवड स्टेशन येथे पोलिसांवर हल्ले झाले आहेत.  

- ताज्या बातम्यांसाठी डाऊनलोड करा ई-सकाळचे ऍप