पुणे - केंद्रीय माध्यमिक शिक्षण मंडळामार्फत (सीबीएसई) (CBSE) गुरुवारी झालेल्या केंद्रीय शिक्षक पात्रता परीक्षेत (सीटीईटी) (CET Exam) तांत्रिक अडचणींमुळे (Technical Problem) उमेदवारांना दुसऱ्या सत्रातील पेपर देणे शक्य न झाल्याची जबाबदारी स्वीकारण्यात आली आहे. सीटीईटी परीक्षेतील गुरुवारी दुसऱ्या सत्रातील पेपर दोन रद्द (Paper Cancel) करण्यात आला. आता गुरूवारच्या दुपारच्या सत्रातील पेपर दोन आणि शुक्रवारच्या दोन्ही सत्रातील (पेपर एक आणि पेपर दोन) हे पुढे ढकलण्यात आले आहेत. संबंधित उमेदवारांना लवकरच पुढील परीक्षेचे वेळापत्रक कळविण्यात येईल, असे ‘सीबीएसई’ने परिपत्रकाद्वारे जाहीर केले आहे.

सीबीएसईने केंद्रीय शिक्षक पात्रता परीक्षा घेण्याची जबाबदारी टीसीएस लिमिटेड या कंपनीकडे सोपवली होती. ही परीक्षा १६ डिसेंबर २०२१ ते १३ जानेवारी २०२२ दरम्यान देशभरातील विविध शहरांमध्ये संगणकीय प्रणालीद्वारे ऑनलाइन पद्धतीने आयोजित केली होती. दरम्यान, ‘सीटीईटी परीक्षेत तांत्रिक अडचणींमुळे गोंधळ’ या शीर्षकाखाली ‘सकाळ’ने १६ डिसेंबर रोजी घेतलेल्या सीटीईटी परीक्षेत तांत्रिक अडचणींमुळे उमेदवारांना परीक्षा देता न आल्याची बातमी शुक्रवारी प्रसिद्ध केली. त्यानंतर ‘सीबीएसई’ने परीक्षा पुढे ढकलण्यात आल्याची माहिती परिपत्रकाद्वारे दिली.

दरम्यान, परीक्षेच्या पहिल्या दिवशी म्हणजेच १६ डिसेंबरला पहिल्या सत्रातील पेपर सुरळीतपणे पार पडला. परंतु दुपारनंतर अचानकपणे आलेल्या तांत्रिक अडचणींमुळे दुसऱ्या सत्रातील पेपर दोन घेणे शक्य झाले नाही, असे टीसीएस लिमिटेडने सीबीएसईला कळविले आहे. या तांत्रिक बिघाडामुळे १६ डिसेंबर रोजी पूर्वनियोजित दुसऱ्या सत्रातील पेपर दोन आणि १७ डिसेंबर रोजी होणारे दोन्ही पेपर (पेपर एक आणि पेपर दोन) पुढे ढकलण्यात आले आहेत. पुढे ढकलण्यात आलेल्या परीक्षेचे माहिती संबंधित उमेदवारांना येत्या काही दिवसांत कळविली जाणार आहे, असे ‘सीबीएसई’ने स्पष्ट केले आहे. तर परीक्षेत आलेल्या तांत्रिक अडचण सोडविण्याच्या कामाला प्राधान्य दिले जात असल्याचे टिसीएसमार्फत सांगण्यात आले आहे.

सीटीईटी परीक्षेतील पुढील सत्र येत्या सोमवारपासून (ता.२०) पूर्वनियोजित वेळापत्रकानुसार सुरू होणार आहे. संबंधित उमेदवारांनी त्यांच्या वेळापत्रकानुसार परीक्षा केंद्रावर पोचवावे, असे आवाहन सीबीएसईमार्फत करण्यात आले आहे.