पुणे - नगर रस्त्यावर चंदननगर येथे ऑइल टँकर उलटल्यानं प्रचंड वाहतूक कोंडी झाली आहे. चंदननगरमध्ये टँकर उलटल्याच्या घटनेला तेरा तास झाले असून अद्याप टँकर रस्त्यावरून हटवण्यात आला नाही. त्यामुळे नगर रस्त्यावर प्रचंड वाहतूक कोंडी झाली असून वाहनांच्या लांबपर्यंत रांगा लागल्या आहेत. रस्त्यावरील हा टँकर हटवण्यासाठी आता मुंबईवरून क्रेन मागवण्यात आली असल्याची माहिती समोर येत आहे.

टँकर हटवण्यासाठी मुंबईवरून क्रेन आणि टँकरमधील ऑइल काढण्यासाठीचा दुसरा टँकर मागविण्यात आलेले आहेत. वाहतूक पोलीस निरीक्षक अजित लकडे म्हणाले, आम्ही टँकर हटवण्यासाठी यंत्रणा मिळवण्याचा पुणे महानगरपालिका, अग्निशामक दल आणि इतर पेट्रोलियम कंपन्यांसोबत चर्चा करून प्रयत्न केला. परंतु पुण्यात अशी कोणतीही व्यवस्था उपलब्ध होऊ शकली नाही. टँकरच्या मालकाशी संपर्क केलेला असून तो मुंबईतून यंत्रणा घेऊन निघाला आहे. क्रेन आणि टॅंकर खंडाळा पर्यंत पोहोचले असल्याची माहिती त्यांनी दिली.

दरम्यान, प्रचंड वाहतूक कोंडी झाली असताना दुसऱ्या बाजुला काही वाहनचालक ऑइल असलेल्या रस्त्यावरून वाहने नेण्याचा प्रयत्न करत आहेत. ऑइलमुळे वाहने घसरत असल्यानं अपघाताची शक्यता नाकारता येत नाही. अशा वाहनचालकांना वाहने ऑइलवरून नेऊ नये यासाठी स्वंयसेवकांकडून आवाहन केलं जात आहे.