पुणे - महापुरुषांच्या महान कार्याविषयी मला मनापासून आदर आहे. त्यांच्याविषयी बोलताना माझ्याकडून बोली भाषेतील शब्द अनवधानाने निघाले, यात मला कोणालाही दुखवायचा हेतू नव्हता. त्या शब्दाबद्दल मी दिलगिरी व्यक्त केलीच आहे. आता पुन्हा एकदा माफी मागतो. शाई फेक झाल्यानंतर घडलेल्या घटनांबाबत माझी कोणाबद्दलही तक्रार नाही. या मुद्द्यावरून महाराष्ट्र अशांत होऊ नये असे वाटते, त्यामुळे आता हा वाद थांबवावा असे आवाहन उच्च व तंत्र शिक्षण मंत्री चंद्रकांत पाटील यांनी निवेदनाद्वारे केले आहे.

चंद्रकांत पाटील यांनी महापुरुषांबद्दल केलेल्या वक्तव्याने वाद निर्माण झाला आहे. त्यामुळे त्यांच्यावर शाईफेक करण्यात आली. याप्रकरणात काही जणांना अटक करण्यात आली आहे. हा वाद वाढत असल्याने पाटील यांनी याबाबत सविस्तर स्पष्टीकरण दिले. आहे.

छत्रपती शिवाजी महाराज, महात्मा ज्योतिबा फुले, डॉ. बाबासाहेब आंबेडकर व कर्मवीर भाऊराव पाटील यांच्या पवित्र स्मृतीस आणि त्यांच्या अनुकरणीय कृतीस मी सदैव वंदन करत आलो आहे. माझ्या कृतीत त्यांचे अनुकरण करत आलो असून, त्यांच्या कार्याविषयी आदर आहे. त्यांच्याविषयी बोलताना माझ्याकडून बोली भाषेतील शब्द अनवधानाने निघाले, यात मला कोणालाही दुखवायचा हेतू नव्हता. त्या शब्दाबद्दल मी दिलगिरी व्यक्त केलीच आहे. पण त्यावरून घडलेल्या घटना माझ्या मनाला क्लेशदायक ठरल्या आहेत.

शिवरायांच्या एका मावळ्यावर असे आरोप लावले जावेत याचे वाईट वाटत आहे. या मुद्द्यावरून महाराष्ट्र अशांत होऊ नये असे मला वाटते. या विषयात कोणाच्या भावना दुखावल्या असतील तर जाहीर माफी मागतो. माझी कोणाविषयी कोणतीही तक्रार नाही. ज्यांना अटक करण्यात आली आहे त्यांची मुक्तता करावी, ज्या पोलिसांचे निलंबन केले आहे ते त्वरित मागे घ्यावे. जर पत्रकारांवर कारवाई करण्यात आली असल्यास तीही मागे घ्यावी. माझ्या तोंडावर ज्यांनी शाईफेक केली त्यांच्याबद्दल मला काहीही म्हणायचे नाही. माझ्या दृष्टीने या वादावर मी पडदा टाकत आहे. आता हा वाद थांबवावा ही विनंती, असे पाटील यांनी नमूद केले आहे.