पुणे : शहराचा विचार केला तर पुणे महानगरपालिका ही राज्यातीलच नाही तर देशातील विस्ताराने सर्वांत मोठी महानगरपालिका आहे. या महापालिकेच्या आकाराचा आणि लोकसंख्येचा विचार करता दोन भाग व्हायला हवेत असं वक्तव्य कॅबिनेट मंत्री आणि भाजपचे माजी प्रदेशाध्यक्ष चंद्रकांत पाटील यांनी केलं आहे. त्यांच्या या वक्तव्यामुळे पुण्यात चर्चा सुरू झाल्या आहेत.

(Chandrakant Patil On Pune Municipal Corporation)

गेल्या काही दिवसांमध्ये पुणे महापालिकेमध्ये २३ नव्या गावाचा सामावेश झाला आहे. त्यामध्ये महापालिकेच्या सिमेशेजारील गावांचा सामावेश आहे. त्यामुळे महापालिकेचे क्षेत्रफळ वाढले पण त्यामुळे अनेक समस्या निर्माण झाल्या. शहराचा विकास व्हायचा असेल तर महापालिकेचे दोन भाग होणे गरजेचे आहे असं चंद्रकांत पाटील बोलताना म्हणाले.

क्षेत्रफळ जेवढं कमी तेवढं विकास करण्यासाठी सोपं जातं असं म्हणत त्यांनी हे वक्तव्य केलं असून त्यांच्या वक्तव्यामुळे आता पुणे महापालिकेचे दोन तुकडे होणार का असा सवाल निर्माण झाला आहे. पुणे जिल्ह्यात पुणे आणि पिंपरी चिंचवड अशा दोन महापालिका आहेत. चंद्रकांत पाटील यांच्या वक्तव्यानुसार जर पुणे महापालिकेचे दोन भाग झाले तर एकट्या पुण्यात तिसरी महापालिका जन्माला येईल.

दरम्यान, महापालिकेत नव्याने सामील केलेल्या २३ गावांमुळे क्षेत्रफळात वाढ झाली आहे. या गावांत महानगरपालिकेच्या योजना हळूहळू पोहोचत असून विकासकामांनाही सुरूवात होत आहे. तर महापालिकेचा कारभार आता प्रशासनाकडे असून दिवाळीनंतर राज्यातील महापालिका आणि स्थानिक स्वराज्य संस्थेच्या निवडणुका होण्याची चिन्हे आहेत. तर चंद्रकांत पाटलांच्या या वक्तव्यामुळे महापालिकेचे दोन भाग केले जाणार का हे पहावं लागणार आहे.