घोडेगाव (पुणे) : आंबेगाव तालुक्यातील घोडेगाव येथील तहसील कार्यालयातील पुरवठा विभागातील पुरवठा निरीक्षक अनिल पाटील व कंत्राटी कामगार जयश्री शेंगाळे यांनी दुबार रेशनकार्ड बनवून देण्यासाठी पैशांची मागणी केल्याने त्यांच्यावर लाचलुचपत प्रतिबंध विभागाने कारवाई केली आहे. या दोघांविरोधात घोडेगाव पोलिस ठाण्यात काल (ता. 22) गुन्हा दाखल करण्यात आला असल्याची माहिती सहायक पोलीस निरीक्षक प्रदीप पवार यांनी दिली. 

तीस दिवसांच्या बाळाची झुंज यशस्वी; ससूनमध्ये उपचार

आंबेगाव तहसील कार्यालय घोडेगाव येथील पुरवठा विभागामध्ये काम करणारी कंत्राटी कामगार जयश्री शेंगाळे यांनी डामसे यांच्याकडे दुबार पिवळे रेशनकार्ड बनवून देण्याकरीता 300 रूपये लाचेची मागणी केली. त्यावेळी शासकीय फी 20 रूपये असताना 300 रूपये का मागता? असे विचारले असता त्यांनी सांगितले की, डिएसओ ऑफिसला 100 द्यावे लागणार आहेत. त्यावर डामसे हे पुरवठा निरीक्षक अनिल भाऊराव पाटील यांना भेटले व शेंगाळे मॅडम रेशनकार्डचे 300 रूपये मागत असल्याचे सांगितले. त्यावर पाटील यांनी त्यांना शेंगाळे यांच्याकडे 100 रूपये देण्याचे सांगितले. 

 पुण्याच्या बातम्या वाचण्यासाठी येथे  क्लिक करा

याबाबतची तक्रार लाचलुचपत प्रतिबंध विभागाकडे आनंद दगडु डामसे (वय 30, रा. गोहे खुर्द) यांनी 6 मार्च रोजी केली होती. त्यानुसार 9 मार्च रोजी सापळा पथकातील लाचलुचपत प्रतिबंधक विभागाच्या पोलीस उपअधीक्षिका प्रतिभा शेंडगे, सुप्रिया कादबाने, नागेश देशमुख, एस. आय. करूणाकर व पंचासमक्ष या तक्रारीची पडताळणी केली. 

त्यानंतर याबाबतची पडताळणी, सापळा कारवाई पंचासमक्ष ध्वनीमुद्रीत झालेल्या संभाषणावरून तहसील कार्यालयातील अनिल पाटील व जयश्री शेंगाळे यांच्याविरूध्द आनंद डामसे यांच्या तक्रारीवरून लाचलुचपत प्रतिबंधक विभागाच्या पथकाने कारवाई केली. या दोघांविरोधात घोडेगाव पोलिस ठाण्यात काल (ता. 22) गुन्हा दाखल करण्यात आला. याबाबतचा पुढील तपास पोलिस उपअधीक्षक प्रतिभा शेंडगे या करत आहे.