पुणे - शिक्षण उपसंचालक कार्यालयात सुरू असलेला बाजार रोखण्यासाठी सध्याचे प्रभारी उपसंचालक आणि अन्य सहायक शिक्षण उपनिरीक्षक यांच्या बदलीबरोबरच विभागीय चौकशीचा प्रस्ताव शिक्षण आयुक्त कार्यालयाने शालेय शिक्षण विभागाच्या सचिव वंदना कृष्णा यांच्याकडे पाठविला आहे. तसेच, राज्यातील सर्वच उपसंचालक कार्यालयांची तपासणी करण्यासाठी संचालक स्तरावरील अधिकाऱ्यांचे पथक तयार करण्यात आले असून, या तपासणीचा अहवाल ३१ डिसेंबरपूर्वी सादर करण्याचे आदेश आयुक्तांनी दिले आहेत.

ताज्या बातम्यांसाठी डाऊनलोड करा ई-सकाळचे ऍप

उपसंचालक कार्यालयात लाचलुचपत प्रतिबंधक विभागाने धाड टाकली. यात पैसे स्वीकारताना एका शिपायाला अटक केली. त्यानंतर या विभागात चालणाऱ्या गैरप्रकाराला ‘सकाळ’ने वाचा फोडली. या गैरप्रकारांच्या पद्धती समोर आणल्या. त्याची गंभीर दखल शिक्षण आयुक्त सोळंकी यांनी घेतली आणि शिक्षण उपसंचालक प्रवीण अहिरे यांच्यासह एका कर्मचाऱ्याची बदली आणि चौकशीचा प्रस्ताव मान्यतेसाठी शिक्षण विभागाकडे पाठविला असल्याचे उच्चपदस्थ सूत्रांनी सांगितले. आता सर्व कार्यालयांमध्ये तीन वर्षांपासून एकाच ठिकाणी काम करणाऱ्या कर्मचाऱ्यांची बदली करण्याचे प्रस्तावित करण्यात आले आहे.

ऑनलाईन व्यवहारात तरुणीला चार लाखांचा गंडा

दरम्यान, प्रत्येक जिल्ह्यातील उपसंचालक कार्यालय हे तीन जिल्ह्यांतील शिक्षक, संस्था यांच्याशी संबंधित कामे करीत असते; परंतु कोणतेही काम विहित वेळेत केले जात नाही, त्यासाठी मोठ्या रकमांची मागणी केली जाते, असे सरकारी यंत्रणेच्या निदर्शनास आले. त्यासाठी राज्यातील सर्व उपसंचालक कार्यालयांची तपासणी करण्याचा आदेश आयुक्त सोळंकी यांनी दिला आहे. पुणे आणि मुंबई विभागातील कार्यालये तपासण्यासाठी शिक्षण संचालक दिनकर पाटील, सोलापूर- लातूरसाठी दिनकर टेमकर, नागपूर- अमरावतीसाठी दत्तात्रेय जगताप, सोलापूर- नाशिकसाठी व्ही. के. खाडके यांना तपासणी करण्याचे आदेश आयुक्तांनी दिले आहेत.