मंचर (पुणे) : आंबेगाव तालुक्यातील मंचर शहरात प्रथमच कोरोनाबाधित महिला रुग्ण आढळून आल्यामुळे शहरात खळबळ उडाली आहे. तिचे पती सलून कारागीर आहेत. अनेकांच्या त्यांनी दाढ्या केल्या असून, केस कापलेले आहेत. त्यामुळे या कारागिराकडून हजामत करून घेतलेल्यांचा शोध प्रशासनाने सुरू केला आहे. वीस जणांना हजामत महागात पडल्याची चर्चा मंचर शहरात जोरदार सुरू आहे.

आंबेगावकरांनो सावधान, कोरोनाबाधितांचा आकडा झपाट्याने वाढतोय  

मंचर हे आंबेगाव तालुक्याचे मध्यवर्ती ठिकाण आहे. गेली दोन महिने लॉकडाउनची येथे प्रभावीपणे अंमलबजावणी करण्यात आली होती. त्यासाठी मंचर पॅटर्नचे विविध प्रयोग यशस्वीपणे राबविण्यात आले होते. पण, सदर महिला मुंबईहून आली. मंचरचे सरपंच दत्ता गांजाळे यांनी तिला ताबडतोब गावाच्या पूर्वेला तीन किलोमीटर अंतरावर एकांतात असलेल्या पोल्ट्रीमध्ये ठेवले होते. तिचे पती तिला सकाळ-संध्याकाळ जेवण व नाष्टा देण्याचे काम करत होते. दरम्यानच्या काळात त्यांनी अनेकांना घरपोच सेवा देऊन दाढी व केस कापले आहेत. 

पुण्याच्या इतर बातम्या वाचण्यासाठी येथे क्लिक करा

सलून कारागिराची पत्नी कोरोना पॉझिटिव्ह आढळल्याची बातमी शहरात वार्‍यासारखी पसरली. ज्यांनी सदर या कारागिराकडून हजामत करून घेतली, त्यांचे तर धाबे दणाणले. मंचर ग्रामपंचायतीचे कर्मचारी. आरोग्य खात्यातील कर्मचारी हजामत करून घेतलेल्यांचा शोध घेत आहेत. या सलून कारागिराच्या कुटुंबातील सहा लोक व हजामत करून घेतलेले 15 लोक, अशा एकूण 21 जणांना होम क्वारंटाइन करण्यात आले आहे. त्यांचेही नमुने मंचर उपजिल्हा रुग्णालयामार्फत घेऊन तपासणीसाठी पुण्याला पाठवले जाणार आहे.
 

दौंडमधील कोरोनाबाधित तरूणाच्या अंत्ययात्रेला गेलेले १५० जण...

दरम्यान, मंचर शहराच्या पूर्वेला तीन किलोमीटर अंतरावर सदर रुग्ण आढळून आला आहे. त्यामुळे पिंपळगाव रस्ता व व संबंधित परिसर सील करावा. मंचर शहर सील करू नये, अशी मागणी व्यापारी व गावकऱ्यांनी तहसीलदार रमा जोशी व गट विकास अधिकारी जालिंदर पठारे यांच्याकडे केली आहे. प्रशासनाकडून याबाबत सकारात्मक विचारविनिमय सुरू असल्याची माहिती सूत्रांनी दिली.