पुणे : कोरोना चाचण्यांमध्ये पुणे देशात आघाडीवर असून, या चाचण्या वाढविल्यामुळे कोरोनाचे निदान वेळेत होऊन रुग्णाला वेळेत उपचार मिळतात. पुणे जिल्ह्यात कोरोना रुग्ण बरे होण्याचे प्रमाण समाधानकारक आहे, असे विभागीय आयुक्त सौरभ राव यांनी सांगितले.

- Ganeshotsav 2020 : पुणेकरांनो, मानाच्या गणपतींच्या विसर्जनाच्या वेळा ठरल्या!​

येरवडा येथील साहित्यरत्न लोकशाहीर अण्णाभाऊ साठे सभागृहामध्ये भारतीय जैन संघटना आणि पुणे महापालिकेच्या वतीने सुरू करण्यात आलेल्या ॲन्टीजेन चाचणी केंद्राची पाहणी विभागीय आयुक्त राव यांनी केली. तसेच लॉकडाऊन कालावधी दरम्यान केलेल्या कार्याच्या अहवाल पुस्तिकेचे प्रकाशनही त्यांच्या हस्ते करण्यात आले. महापौर मुरलीधर मोहोळ, नगरसेवक अविनाश साळवे, भारतीय जैन संघटनेचे संस्थापक शांतिलाल मुथ्था, साहिल देव आदी या वेळी उपस्थित होते.  

राव म्हणाले, नैसर्गिक संकटात सामाजिक संस्थांच्या मदतीची आवश्यकता असते. भारतीय जैन संघटनेसारख्या अनेक सामाजिक संस्था कोरोना संसर्ग उपाययोजनांच्या कामात कार्यरत आहेत, ही महत्त्वपूर्ण बाब आहे. यामुळे नागरिकांची आरोग्य तपासणी गतीने होण्यास मदत झाली. कोरोनाचे वेळीच निदान झाल्याने मृत्यूदर कमी करण्यास मदत झाली.

- मोहरम मिरवणूक काढण्यास सर्वोच्च न्यायालयाचा नकार; 'मिरवणुकीला परवानगी दिली तर...'​

पुणे महापालिका क्षेत्रात देशात सर्वाधिक कोरोना निदानाच्या चाचण्या होत आहेत. सलग ५२ दिवसांपासून पुणे कोरोना निदानासाठीच्या चाचण्यांमध्ये आघाडीवर आहे. कोरोना रुग्ण बरे होण्याचे प्रमाण वाढते आहे, ही समाधानकारक बाब आहे. कोरोनातून बरे झालेल्या आणि प्लाझ्मा दान पात्रतेचे निकष पूर्ण करत असलेल्या नागरिकांनी प्लाझ्मा दानासाठी पुढे यावे. यासाठी सामाजिक संस्थांनी पुढाकार घ्यावा, असे आवाहन त्यांनी केले.

महापौर मोहोळ म्हणाले, कोरोनासारख्या आपत्तीच्या काळात सामाजिक संस्थांनी मदतीचे महत्त्वपूर्ण कार्य केले आहे. कोरोना निदानासाठीच्या चाचण्याही वाढविण्यात आल्या आहेत. निदान आणि उपचार वेळेत होतील, याकडे विशेष लक्ष दिले जात आहे. लवकरच पुणे शहर कोरोनामुक्त होईल, असा विश्वास त्यांनी व्यक्त केला.

- पुण्याच्या बातम्या वाचण्यासाठी येथे ► क्लिक करा

(Edited by : Ashish N. Kadam)