नारायणगाव (पुणे) : कोरोनाविषयक नियम व अटींचे उल्लंघन करून जुन्नर तालुक्यातील हिवरेतर्फे नारायणगाव येथील ओसारा हॉटेलमध्ये थाटामाटात संपन्न झालेला विवाह सोहळा सामाजिक स्वास्थ बिघडविणारा ठरला आहे. या विवाह सोहळ्यातील बावीस जणांना आजअखेर कोरोनाचा संसर्ग झाला आहे. या मध्ये वधू, वर, वर पिता यांच्यासह नातेवाईकांचा समावेश आहे. वधूच्या आजीचे कोरोनामुळे नुकतेच निधन झाले आहे, अशी माहिती वैद्यकीय अधिकारी डॉ. वर्षा गुंजाळ यांनी दिली.

पुण्यात आज पावसाचा इशारा

कोरोना रुग्णांची संख्या वाढत चालल्यामुळे विवाह सोहळ्यात सहभागी झालेल्या आजी-माजी आमदार, व्यापारी यांच्यासह सुमारे तीनशे जणांचे धाबे दणाणले आहेत. निसर्गरम्य परिसरसतील हिवरेतर्फे नारायणगाव येथील ओसारा हॉटेलमध्ये १३ ऑगस्ट रोजी येथील व्यापाऱ्याच्या मुलाचा विवाह धुमधडाक्यात पार पडला. आपल्या नातीचा विवाह पाहण्याची इच्छा पूर्ण व्हावी, या हेतूने कोरोनाबाधित असलेली वधूची आजी विवाह सोहळ्यास उपस्थित होती. त्यानंतर पुणे येथे उपचार सुरू असताना या कोरोनाबाधित आजीचे निधन झाले. त्यामुळे सोशल मीडियावर या नियमबाह्य विवाह सोहळ्याची चर्चा सुरू झाली. दरम्यान, वधू व विवाह सोहळ्यात सहभागी झालेले अकरा जण कोरोनाबाधित झाले.

पुरंदर विमानतळाच्या निर्णयाच्या टेकआॅफविनाच बैठक

या घटनेची गंभीर दखल घेत पोलिस प्रशासनाने कार्यमालक व ओसारा हॉटेलचे मालक यांच्यावर २४ ऑगस्ट रोजी गुन्हा दाखल केला. दरम्यान, कोरोनाची लक्षणे दिसू लागल्यामुळे वर, वर पिता व इतर व्यक्तींची कोरोना तपासणी करण्यात आली. शुक्रवारी सायंकाळी मिळालेल्या अहवालानुसार तपासणीत वर, वर पिता यांच्यासह अकरा जण कोरोना पॉझीटिव्ह आढळून आले. त्यामुळे विवाह सोहळ्यामुळे कोरोना संसर्ग झालेल्या रुग्णांची एकूण संख्या बावीस झाली आहे. या विवाह सोहळ्यास पुणे, मुंबई  व अन्य भागांतून साहभागी झालेल्या व्यक्तींची माहिती प्रशासनाला अद्याप मिळाली नाही. नियमांचे उल्लंघन करणारा विवाह सोहळा पोलिसांनी वेळीच थांबवला असता, तर कोरोनाचा संसर्ग टाळता आला असता.

पुण्याच्या इतर बातम्या वाचण्यासाठी येथे क्लिक करा
 
या घटनेची पुणे ग्रामीणचे पोलीस अधीक्षक संदीप पाटील यांनी गंभीर दखल घेतली आहे. या पुढील काळात विवाह सोहळा व अन्य धार्मिक कार्यक्रम करताना नियमाचे पालन न करणारे कार्यमालक अथवा जबाबदार व्यक्तींवर कार्यक्रम सुरु असतानाच गुन्हे दाखल करा, असा आदेश दिला आहे.