न्हावरे (पुणे) : शिरूर तालुक्यातील न्हावरे परिसरातील कोकडेवाडी येथे पेरणीच्या कामासाठी आठ दिवसांपूर्वी आलेल्या व मूळच्या कोंढवा (पुणे) येथील रहिवासी असलेल्या ५५ वर्षीय महिलेचा कोरोना तपासणीचा अहवाल पाॅझिटिव्ह आला आहे. त्यामुळे पुन्हा परिसरात घबराटीचे वातावरण पसरले आहे.

 पुण्यातील दोन खासदार टाॅप फाईव्ह परफाॅर्मर 

कोकडेवाडी येथे कोंढवा येथून एक ५५ वर्षीय महिला शेतातील पेरणीच्या कामासाठी १२ जून रोजी आली होती. दरम्यानच्या काळात या महिलेने आपला मुक्काम कोकडेवाडी येथील नातलगांच्या घरी केला होता. ही महिला परत कोंढवा येथील आपल्या घरी गेल्यानंतर तिच्या कोंढवा येथे राहणाऱ्या पुतण्याचा कोरोना तपासणीचा अहवाल पाॅझिटिव्ह आला. त्यामुळे संबंधित महिलेची कोरोना तपासणी केली. त्यात तिचा अहवाल २० जून रोजी पाँझिटिव्ह आला आहे. याच महिलेच्या कोकडेवाडी येथील दोन नातलगांनी तिच्या कोंढवा येथील घरी एक दिवस मुक्काम केल्याने प्रशासनाची काहीशी काळजी वाढली आहे. 

खरिप हंगामाच्या प्रारंभीच शेतकऱ्यांची कोंडी

संबधित महिलेचा कोरोना तपासणीचा अहवाल पाॅझिटिव्ह असल्याचे समजताच ग्रामप्रशासन व आरोग्य विभागाची यंत्रणा संतर्क झाली असून, या महिलेच्या कोकडेवाडी येथे संपर्कात आलेल्या दहा व्यक्तींना होम क्वारंटाइन करण्यात आले आहे. उद्या (ता. २३) आरोग्य विभागामार्फत होम क्वारंटाइन करण्यात आलेल्या दहा व्यक्तींचे स्वॅब तपासणीसाठी पाठविण्यात येणार असून, प्रतिबंधात्मक उपाययोजनांचे काम हाती घेण्यात आले असल्याचे सरपंच मंदा शेंडगे व ग्रामविकास अधिकारी पी. सी. केदारी यांनी सांगितले.

पुण्याच्या इतर बातम्या वाचण्यासाठी येथे क्लिक करा  

न्हावरे येथे वीस दिवसांपूर्वीच मुंबई (अंधेरी) येथून एक महिला व पुरुष येथे आल्यानंतर त्यांना कोरोनाची लागण झाली होती. पंधरा दिवसाच्या उपचारानंतर त्यांचे अहवाल निगेटिव्ह आले. त्यानंतर ग्रामस्थांनी सुस्कारा सोडला होता. मात्र, आता पुन्हा महिला पाॅझिटिव्ह निघाल्यामुळे ग्रामस्थामध्ये चिंतेचे वातावरण निर्माण झाले आहे.