पुणे - ससून रुग्णालयाच्या दारात शुक्रवारी झालेल्या धो-धो पावसात भिजत पडलेल्या त्या जर्जर देहाने मंगळवारी अखेरचा श्वास घेतला. वेदनेने विव्हळणारा तो उपचारासाठी रुग्णालयाच्या दारापर्यंत आला, पण त्याला दाखल करण्यासाठी रुग्णालयात ड्युटी कोणाचीच नव्हती! 

रवी धन्नाप्पा शिंदे (रा. बाणेर) असे त्या दुर्दैवी व्यक्तीचे नाव आहे. एक महिला शिंदे यांना ससूनच्या प्रवेशद्वाराजवळ सोडून निघून गेली होती. 

ताज्या बातम्यांसाठी डाऊनलोड करा ई-सकाळचे ऍप  

उपचारांसाठी रुग्णालयाच्या दारापर्यंत शिंदे आले पण, इतक्‍यात धो-धो पाऊस पडू लागला. कोसळणाऱ्या पावसात ते जमिनीवर पडले. वेदेनेने विव्हळू लागले. त्यांना चक्कर येऊ लागली. मात्र, पोलिस, रुग्णवाहिकेतील कर्मचारी, ससून रुग्णालयातील कर्मचारी, परिचारिका, सुरक्षारक्षक, डॉक्‍टर यांपैकी कोणीही शिंदे यांना दाखल केले नाही. संवेदनशील मनाला सुन्न करणारी ही घटना होती. या वेळी तेथून जाणाऱ्या डॉ. मानसी पवार यांचे या रुग्णाकडे लक्ष गेले. सध्या रुग्णालयात कोरोना उद्रेकामुळे रुग्णांची प्रचंड गर्दी आहे. रुग्णालय रुग्णांनी पूर्ण भरले आहे, अशी सारवासारव डॉक्‍टरांनी केली. अखेर शिंदे यांना दाखल करून घेतले. या बाबतचे वृत्त शनिवारी (ता. 25) "सकाळ'मध्ये प्रसिद्ध झाले होते. 

पुण्याच्या बातम्या वाचण्यासाठी येथे क्लिक करा

शिंदे यांना कोरोना नसल्याचे स्पष्ट झाले होते. त्यांना अँनेमिया होता. गेल्या दोन दिवसांपासून त्यांच्यावर उपचार सुरू होते. त्याचे शरीर उपचारांस प्रतिसाद देत नव्हते. त्यातच मंगळवारी त्यांनी अखरेचा श्वास घेतला. या घटनेबाबत सविस्तर चौकशी झाली. पण, त्या रुग्णाचा प्राण वाचला नाही. रुग्णालयात दाखल होण्याची झुंज रुग्ण जिंकला खरा, पण मृत्यूशी लढाई हरला. 

संवेदनशील मन सुन्न करणारी ससून रुग्णालयातील घटना वाचा सविस्तर...