घोडेगाव (पुणे) : आंबेगाव तालुक्याच्या पश्चिम भागातील भीमाशंकर, कोंढवळ, आहुपे व डिंभे धरणाच्या परिसरामध्ये मोठ्या प्रमाणात पर्यटक येत आहेत. या भागामध्ये कोरोनाबाधित रूग्णांची संख्या वाढत आहे. त्यामुळे पर्यटकांना गावबंदी करण्याची मागणी उपविभागीय अधिकारी यांचेकडे केली असल्याचे पंचायत समिती सभापती संजय गवारी व माजी उपसभापती नंदकुमार सोनावले यांनी सांगितले. 

ताज्या बातम्यांसाठी डाऊनलोड करा ई-सकाळचे ऍप

आंबेगाव तालुक्यात स्थानिक कोरोना रूग्णांची संख्या झपाट्याने वाढत असताना पश्चिम भागामध्ये कोरोनाचा प्रादुर्भाव कमी प्रमाणात जाणवत आहे. परंतु, या भागात नागरिक पर्यटनास येत आहेत. तसेच, आदिवासी भागातील नागरिक सातगाव पठार भागामध्ये बटाटा काढणीला मोठ्या प्रमाणात येत आहेत. मात्र, या भागामध्ये कोरोनाचा मोठा प्रादुर्भाव आहे. त्यामुळे आदिवासी भागात कोरोना पसरण्याची भिती निर्माण झाली आहे. त्यामुळे रोजगार हमी योजनेअंतर्गत गावातच काम उपलब्ध व्हावे, यासाठी ग्रामपंचायतीमार्फत अर्ज गोळा करण्याचे काम करण्यात येत आहे.

ग्राहक खायला येईनात, बारला परवानगी द्या; व्यावसायिकांची मागणी

स्थानिक नागरिकांना रोजगार उपलब्ध करावा, यासाठी सोनावले यांनी संबंधित ग्रामपंचायतींना सुचना दिल्या आहेत. तर, रोजगार हमी योजनेअंतर्गत असलेल्या कामांसाठी जास्तीत जास्त लोकांनी यामध्ये सहभाग घ्यावा, असे आवाहन गवारी यांनी केले आहे. 
तसेच, या भागामध्ये कारोनाचा प्रादुर्भाव वाढू नये, यासाठी खबरदारीची उपाययोजना म्हणून बाहेर गेलेल्या व्यक्तींची तपासणी करून गावात पाठवावे, म्हतारबावाडी येथील महाराष्ट्र पर्यटन महामंडळाचे भक्त निवास कोरोना सेंटर; तर तळेघर येथील ग्रामीण रूग्णालय येथे रूग्णांवर उपचार करण्याची व्यवस्था करण्याबाबत कामगारमंत्री दिलीप वळसे पाटील यांनी प्रशासनाला सूचना दिल्या आहेत.