भिगवण (पुणे) : येथील स्वामी विवेकानंदनगर येथे उभारण्यात आलेल्या खासगी कोविड केअर सेंटरमुळे या भागातील रहिवाशांना कोरोना संसर्गाचा धोका निर्माण झाल्याची तक्रार करत लोकवस्तीमधील कोविड केअर सेंटर तातडीने स्थलांतरित करावे, अशी मागणी येथील स्वामी विवेकानंदनगर, शरदनगर व मंगलदृष्टी सोसायटीतील रहिवाशांनी केली आहे. याबाबत रहिवाशांनी जिल्हाधिकारी, प्रातांधिकारी, तहसीलदार व आरोग्य अधिकारी यांच्याकडे निवदेन दिले आहे.

- ताज्या बातम्यांसाठी डाऊनलोड करा ई-सकाळचे ऍप

- पुण्याच्या बातम्या वाचण्यासाठी येथे ► क्लिक करा

 
ज्या ठिकाणी हे कोविड केअर सेंटर उभारण्यात आले आहे ते दाट लोकवस्ती व वर्दळीचे ठिकाण आहे. तेथे रुग्णवाहिका, वाहने पार्किंगसाठी व नातेवाइकांना थांबण्यासाठी जागा उपलब्ध नाहीत. तसेच कोरोना रुग्णांचे नातेवाईक या भागांमध्ये फिरत असल्यामुळे कोरोनाचा धोका वाढला आहे, अशी तक्रार या भागातील रहिवाशांनी केली आहे. आंदोलन करण्याचा इशाराही या भागातील रहिवाशांनी दिला आहे. खासगी कोविड केअर सेंटरच्या संचालकांनी सांगितले की, रहिवाशांना कोणतीही अडचण होणार नाही अशी व्यवस्था करून त्यांचा गैरसमज दूर करू. 

Video : अजित पवार यांनी पुण्यातील मेट्रोचे काम वेळेत पूर्ण करण्याच्या दिल्या सूचना

खासगी कोविड सेंटरबाबत नागरिकांच्या तक्रारी प्राप्त झाल्या आहेत. याबाबत आरोग्य विभागास चौकशी करण्याच्या सूचना देण्यात आल्या आहेत. त्यांचा अहवाल प्राप्त झाल्यानंतर योग्य ती कार्यवाही करण्यात येईल. 
- सोनाली मेटकरी, तहसीलदार, इंदापूर 

 

ट्रॉमा केअरमधील जागा द्यावी... 
येथील ट्रॉमा केअरमध्ये सध्या सरकारी कोविड केअर सेंटर सुरू आहे. ट्रॉमा केअरमध्ये आणखी काही इमारती उपलब्ध आहेत. प्रशासनाने खासगी हॉस्पिटलला ट्रॉमा केअर सेंटरमधील सरकारी इमारत कोविड केअर सेंटरसाठी काही काळ वापरण्यास दिली तर रहिवाशांचाही प्रश्न सुटेल आणि कोविड रुग्णांना उपचारही मिळेल, अशी भावना व्यक्त होत आहे.