पुणे : सध्या पुणे जिल्ह्याच्या दौऱ्यावर असलेले उपमुख्यमंत्री अजित पवार (Ajit Pawar) यांच्या सकाळी लवकर काम करण्याच्या शैलीमुळं शासकीय अधिकाऱ्यांची धावपळ झाली. आज सकाळी सात वाजल्यापासूनच अजित पवार यांनी कामांचा धडाका लावला. त्यावर, 'मी आठ दिवसांतून इथं येणार, अधिकाऱ्यांनी 8 दिवसांतून एकदा लवकर उठलं तर, बिघडत नाही', अशी प्रतिक्रिया अजित पवार यांनी दिली. 

ताज्या बातम्यांसाठी डाऊनलोड करा ई-सकाळचे ऍप

शरद पवारांनी लावलेली सवय
जिल्हा परिषदेतील पदासाठी इच्छुक सदस्यांच्या मुलाखती घेतल्यानंतर उपमुख्यमंत्री अजित पवार यांनी मीडियाशी संवाद साधला. त्यावेळी अजित पवार म्हणाले, 'सकाळी  सहापासून कामाला लागायचं हीच माझी स्टाईल आहे. शरद पवार यांनी आम्हाला तसं शिकवलं आहे. त्याला मी काय करू शकत नाही. मुळात मी आठ दिवसांनंतर पुण्यात येणार. मी रोज इथ नसतो. मग, आठ दिवसांतून एकदा अधिकाऱ्यांनी लवकर उठलं तर काही बिघडणार नाही. पोलिसांना घरं मिळाली पाहिजेत, यासाठी आम्ही आग्रही आहोत. त्यामुळचं त्या कामाची सकाळी पाहणी केली.'

आणखी वाचा - सत्ताबदल झाला आणि अधिकाऱ्यांची पहाटे पळापळ

सारथीबाबत काय म्हणाले अजित पवार?
सारथी संस्थेसाठी खासदार संभाजीराजे छत्रपती आंदोलन करत आहेत. त्यावर अजित पवार म्हणाले, 'सारथी संस्थेबाबत दोन बाजू समोर येत आहेत. चुकीचं काही घडलं असेल तर, कुणाचीही गय केली जाणार नाही. चुकीचं घडलं असेल तर आम्ही बदल करू. संभाजीराजे यांनी मुख्यमंत्री उद्धव ठाकरे यांची भेट घेतली आहे. त्यांची माझी भेट झालेली नाही. पण, मी त्यांना आवाहन करतो की त्यांनी उपोषण करू नये. त्यांनी मुंबईत येऊन चर्चा करावी.'