बारामती, ता. 18- धनगर समाजाला आरक्षण मिळत नसल्याने व्यथित होऊन येत्या 20 सप्टेंबर रोजी खंबाटकी घाट अडविण्याचे आंदोलन झाल्यानंतर आपण आत्महत्या करणार असल्याची घोषणा राष्ट्रवादी युवक कॉंग्रेसचे प्रदेश उपाध्यक्ष किशोर मासाळ यांनी केली आहे.

आज फेसबुक लाईव्ह करत त्यांनी प्रशासनासह राज्य सरकारलाही दोन दिवसात धनगर आरक्षणाबाबत निर्णय घ्यावा अन्यथा खंबाटकी घाटातील रास्ता रोकोनंतर मी माझे जीवन संपविणार असल्याचा इशारा दिला आहे. गेल्या अनेक वर्षांपासून धनगर समाजाला सातत्याने आरक्षणाची भूलथापा देत त्यांच्या भावनांशी खेळण्याचेच काम केले गेले, प्रत्यक्षात आरक्षण काही मिळालेच नाही, त्या मुळे मला आता जगण्याची इच्छा राहिलेली नसून मी माझे जीवन संपविणार असल्याचे त्यांनी फेसबुक लाईव्हमध्ये नमूद केले.

किशोर मासाळ हे बारामतीतील राष्ट्रवादीचे कार्यकर्ते असून उपमुख्यमंत्री अजित पवार यांनी त्यांना नुकतेच राष्ट्रवादी युवक कॉंग्रेसच्या राज्याच्या उपाध्यक्षपदाची जबाबदारी सोपविली होती. धनगर आरक्षणाच्या चळवळीत मासाळ कार्यरत असून त्यांनी आता आरक्षणासाठी टोकाची भूमिका जाहीर करुन खळबळ उडवून दिली आहे.

मी आत्महत्या करणार असा मेसेज किशोर मासाळ यांनी व्हायरल केल्यानंतर बारामतीतही काही काळ गोंधळाचे वातावरण होते. त्यांनी फेसबुक लाईव्हवर आपली सविस्तर भूमिका मांडत सरकारला आरक्षणाबाबत निर्णय घेण्यासाठी दोन दिवसांचा अवधी देऊ केला आहे. या काळात योग्य तो निर्णय झाला नाही तर आपण आपले जीवन संपवू, त्याला राज्य सरकार व संबंधित यंत्रणा व नेते जबाबदार असतील असेही त्यांनी आपल्या फेसबुक लाईव्ह मध्ये नमूद केले आहे.

इतर समाजाच्या आरक्षणासंदर्भात कार्यकर्त्यांवरील गुन्हे मागे घेतले गेले, धनगर आरक्षणाबाबतीतल गुन्हे मागे घेतले जात नसल्याबद्दलही त्यांनी हा दुजाभाव सरकार का करत असल्याचा सवाल उपस्थित केला.

मराठा आरक्षणाच्या मनोज जरांगे यांच्या उपोषणानंतर आता धनगर आरक्षणाची तीव्रता वाढू लागल्याने सरकार या बाबत नेमकी काय भूमिका घेणार या कडे सर्वांचे लक्ष लागून राहिले आहे.