लोणी काळभोर : कदमवाकवस्ती (ता. हवेली) येथे शनिवारी (ता. १६) रात्री आठ वाजण्याच्या सुमारास विजेच्या गडगडाटात वादळी पाऊस झाला. पाऊस उघडल्यानंतर कदमवाकवस्ती हद्दीतील पठारे वस्तीमधील एका मोकळ्या मैदानात दोन फूट रुंदीचा व अंदाजे २५ ते ३० खोलीचा खड्डा आढळून आला आहे. विशेष म्हणजे या खड्ड्यात दहा फुटाच्या खोलीच्या खाली १५ ते २० खोल पाणी असल्याने, हा खड्डा वीज पडल्याने की आणखी नेमका कसा पडला याची ग्रामस्थांत दिवसभर चालू होती. 

कदमवाकवस्ती, लोणी काळभोरसह पुर्व हवेलीला वादळी वारा व विजेच्या गडगडाटात शनिवारी संध्याकाळी दोन तासांहून अधिक काळ अवकाळी पावसाने हजेरी लावली. पावसापेक्षाही वादळी वारा जास्त असल्याने, या परिसरातील काही फ्लेक्स, झाडे तुटून पडली.  

 ताज्या बातम्यांसाठी डाऊनलोड करा ई-सकाळचे ऍप

दरम्यान, सकाळी काही नागरीक मोकळ्या मैदानात आले असता, नागरीकांना हा खड्डा आढळून आला. शनिवारी सांयकाळपर्यंत नसलेला खड्डा, रविवारी सकाळी अचानक आढळून आल्याने, रात्री पावसात वीज पडली व वीज पडल्यानेच हा खड्डा पडला असावा ही चर्चा सुरु झाली. त्यातच एका नागरीकाने खड्डा पडल्याच्या ठिकाणी वीज पडताना पाहिल्याचे सांगितल्याने, कदमवाकवस्ती व परीसरातील नागरीकांनी खड्डा पाहण्यासाठी गर्दी केली होती. गावकामगार तलाठी सुजित झांजे यांनी घटनास्थळी भेट देऊन घटनेची माहिती घेतली. 

पुण्यावर नामुष्की : ऍम्ब्युलन्स न आल्यानं रस्त्यावर एकाचा मृत्यू 

याबाबत अधिक माहिती देताना तलाठी सुजित झांजे म्हणाले, ''खड्डा पडलेल्या जागेची माहिती घेतलेली आहे. खड्डा कसा व कधी पडला याची नेमकी माहिती मिळालेली नाही. तसेच या परीसरात पावसामुळे नुकसानही झालेले नाही. मात्र खड्डा कसा पडला याबाबतची माहिती घेण्याचे काम चालु आहे.''