पुणे : कोरोना बाधित पण सौम्य लक्षणे असणाऱ्या रुग्णांसाठी मोफत ऑनलाईन सल्ला केंद्र सुरू करण्यात आले आहे. बी.जे. वैद्यकीय महाविद्यालयातून शिक्षण पूर्ण करणाऱ्या डॉक्टरांनी हा उपक्रम सुरू केला आहे. सकाळी नऊ ते संध्याकाळी सात यावेळेत ही सुविधा पुरवत असल्याचे डॉ. मृण्मयी मांगले यांनी सांगितले.

कोरोना बाधितांपैकी ८० टक्के रुग्णांना फक्त सौम्य लक्षणे असतात. अशावेळी त्यांनी डॉक्टरांचा सल्ला घेऊन घरीच उपचार घेतल्यास आरोग्य व्यवस्थेवरील ताण कमी होईल आणि सर्वांना योग्य उपचार मिळतील. हा उपक्रम राबविणाऱ्या हेल्थकॉप प्रायव्हेट लिमिटेड कम्पनीच्या संचालक डॉ. मांगले म्हणाल्या,"ससून अर्थात बी.जे. मधून शिक्षण पूर्ण करून बाहेर स्वतःचा व्यवसाय करणाऱ्या डॉक्टरांनी हा उपक्रम सुरू केला आहे. यामध्ये रुग्णांना मोबाईल कॉल वर मोफत सल्ला देण्यात येणार आहे. तसेच यासंबंधीची औषधे आणि चाचण्या घरच्या घरीच पुरवता येतील का असा आमचा विचार आहे." 'हेल्पकॉप इ क्लिनिक' नावाने हा उपक्रम सुरू आहे. रुग्णांसाठी एक हेल्पलाईन क्रमांक जारी करण्यात आला आहे. यावर फोन केल्यानंतर रुग्णच्या आरोग्याच्या स्थितीच्या आधारे थेट तज्ञ डॉक्टर सल्ला देणार आहे. मराठा अंथर्योप्रेनर असोसिएशनचे याला सहकार्य आहे.

हेल्पलाईन क्रमांक :

(सकाळी ९ ते सायंकाळी ७)

9822491691

संकेतस्थळ :

www.healthcop.in/digital-clinic/#

पुणे शहरातील नागरिकांसाठी आम्ही ही सुविधा उपलब्ध केली आहे. गृहविलागीकरणात सौम्य लक्षण असलेल्या रुग्णांसाठी मोफत सल्ला डॉक्टर देणार आहे.

- डॉ. मृण्मयी मांगले, संस्थापक संचालक, हेल्थकॉप