किरकटवाडी (पुणे) : खडकवासला धरणाच्या मागच्या बाजूला मुठा नदी पात्रात असलेल्या पुलाजवळ एका तरुणाने दारूच्या नशेत उडी मारली असून पाण्याच्या जोरदार प्रवाहामुळे तरुण वाहून गेला असून पुणे महानगर प्रदेश विकास प्राधिकरणाच्या अग्निशमन दलाच्या जवानांकडून शोधकार्य सुरू आहे. उत्तम नगर पोलिस स्टेशनचे पोलिस उपनिरीक्षक अभिजीत ढेरे हेही घटनास्थळी दाखल झाले आहेत.
     

- ताज्या बातम्यांसाठी डाऊनलोड करा ई-सकाळचे ऍप
- पुण्याच्या बातम्या वाचण्यासाठी येथे ► क्लिक करा 

सूरज शिवाजी भातकर(वय 30, रा. येरवडा) असे पाण्यामध्ये उडी मारलेल्या तरुणाचे नाव असून दुपारी दोनच्या दरम्यान तो व त्याचा एक मित्र फिरण्यासाठी आले होते. मुठा नदीतील खडकावर बसून दोघांनी मद्यप्राशन केले. त्यानंतर चार ते साडेचारच्या दरम्यान घरगुती वादाचे खूप टेन्शन आले आहे असे म्हणत सूरज उभा राहिला व नशेमध्ये त्याने पाण्याच्या प्रवाहामध्ये उडी घेतली. सूरज बरोबर फिरण्यासाठी आलेला त्याचा मित्र अनिल नक्ताळ यानेही सूरजला वाचविण्यासाठी पाण्यामध्ये उडी घेतली; परंतु पाण्याचा प्रवाह जास्त असल्याने सूरज पुढे वाहत गेला. फिरण्यासाठी आलेल्या इतर तरुणांनी अनिल नक्ताळ याला वाचविले. यामध्ये अनिल किरकोळ जखमी झाला आहे. मात्र, सुरजचा अजून शोध लागलेला नाही.

हे वाचा - शांत बेलबाग चौक अन् निवांत पोलिस ; अनंत चतुर्दशीचे दुर्मिळ दृष्य

सध्या खडकवासला धरणातून मुठा नदीपात्रात 1700 क्युसेक वेगाने पाणी सोडण्यात येत आहे. खडकाळ भाग असल्याने पाण्याचा वेगही जास्त आहे. अंधार झाल्याने शोधकार्यात अडथळे येत आहेत. अग्निशमन विभागाचे प्रमुख देवेंद्र पोटफोडे यांच्या मार्गदर्शनाखाली पुणे महानगर प्रदेश विकास प्राधिकरणाच्या अग्निशमन दलाचे जवान, पोलिस निरीक्षक सुनिल पंधरकर यांच्या मार्गदर्शनाखाली उत्तम नगर पोलिस स्टेशनचे पोलिस कर्मचारी व येरवडा येथील काही तरुण सूरजचा शोध घेत आहेत.