शिक्रापूर (पुणे) : लॉकडाउनचा गैरफायदा घेऊन कालवा समितीच्या बैठकीशिवाय सुरू केलेल्या चासकमानच्या "हेड टू टेल' पाणी वितरणावरून शिरूर तालुक्‍याच्या पश्चिम भागातील शिक्रापूर, पिंपळे जगताप, करंदी परिसरात पाटबंधारे खात्यावर संताप व्यक्त होत आहे. थेट शिरूर तालुक्‍याच्या पूर्व भागासाठी पाणी देण्याच्या विरोधात या भागातील शेतकऱ्यांनी आंदोलनाचा इशारा दिला आहे. 

शिरूरच्या तहसीलदारांनी उचलले हे महत्त्वाचे पाऊल

चासकमान धरण या या वर्षी पूर्ण क्षमतेने भरले. त्यामुळे चासकमान कालव्याचे उन्हाळी आवर्तन कालवा समितीच्या निर्णयानुसार होईल, असे वाटले होते. मात्र, बैठक न घेता पाटबंधारे खात्याने 13 मार्चला पाणी वितरण सुरू केले. तालुक्‍याच्या पश्‍चिम भागातील शिक्रापूर परिसरातील पिंपळे जगताप, वाजेवाडी, करंदी, जातेगाव खुर्द, सणसवाडी आदी गावांमध्ये केवळ आठच दिवस पाणी सोडून थेट तालुक्‍याच्या पूर्व भागाकडे पाणी नेण्यात आले.

पुण्याच्या इतर बातम्या वाचण्यासाठी येथे क्लिक करा 

याबाबत पाटबंधारे खात्याने शेतकऱ्यांना माहितीही दिली नाही. "दुसऱ्या टप्प्यात पाणी देऊ,' असे सांगितले. मात्र, आता पाणी द्यायला टाळाटाळ होत असल्याची तक्रार आहे. उन्हाचा तडाखा, शेतात पिके करपत असताना काही गावांत विहिरीही आटू लागल्या आहेत. पाणी देण्याबाबत खात्याकडे लेखी नियोजन नसल्याने शेतकरी संतप्त आहेत. पाटबंधारे खात्याच्या म्हणण्यानुसार, 92 ते 129 शाखेपर्यंतचे पाणी वितरण उरकले की, 72व्या कालवा किलोमीटरच्या शाखांना पाणी दिले जाईल. मात्र, याबाबत काहीच ठोस सांगितले जात नसल्याने शेतकरी संतप्त आहेत. 

कालवा समितीच्या बैठकीची काहीच माहिती आम्हाला नाही. मात्र, 5 ते 10 मेपर्यंत पाणी शिक्रापूर भागाला देता येईल, असे नियोजन आहे. सध्याचे रोटेशन 45 दिवसांचे होते. ते सोमवारी (ता. 27 एप्रिल) संपले. यालाच जोडून पुढील दुसरे रोटेशन सुरू केल्याची माहिती मिळत आहे. 
- एस. के. गायकवाड, 
शाखा अभियंता