पुणे - आइन्स्टाईन यांचा विशेष सापेक्षता सिद्धांत (स्पेशल थिअरी ऑफ रिलेटिव्हिटी) प्रत्यक्ष निरीक्षणाद्वारे आर्थर एडिंग्टन या शास्त्रज्ञाने १९१९ मध्ये सिद्ध केला. त्याने नोंदविलेल्या निरीक्षणांमुळे सापेक्षतावादाच्या सिद्धांताला प्रत्यक्ष पुरावा मिळाला. पण, त्याचबरोबर जगाच्या वैज्ञानिक क्षितिजावर ‘अल्बर्ट आइन्स्टाईन’ या महान शास्त्रज्ञाचा उदय झाला. या महत्त्वपूर्ण घटनेची शंभरी जगभरातील खगोलशास्त्रज्ञांनी बुधवारी (ता. २९) साजरी केली.

‘जागतिक खगोलशास्त्र संघटने’तर्फे ब्राझील आणि आफ्रिकेत परिषदा आयोजित केल्या होत्या. संघटनेच्या अध्यक्षा इव्हाईन वॅन डस्कहॉईक आणि महासचिव तेरेसा लॅगो उपस्थित होत्या. पॅरिसमध्ये ‘एडिंग्टन - भौतिकशास्त्र आणि तत्त्वज्ञान’ परिषदेने आयोजित केली होती. डस्कहॉईक म्हणाल्या, ‘‘१९१९ मध्ये एडिंग्टन यांनी घेतलेल्या निरीक्षणामुळे वैज्ञानिक जगतात सकारात्मक बदल झाले. पण, त्याचबरोबर जगातील वैज्ञानिकांमध्ये सहकार्याची मोठी परंपरा उभी राहिली. अगदी परस्पर विरोधी मते असतानाही शास्त्रज्ञांनी एकत्र कामे 
केली.’