इंदापूर : गाळपेर क्षेत्रातील ऊसतोडी बाबत पोलिसांनी सन्मानजनक वागणूक न दिल्याने तक्रारदार ज्येष्ठ महिला सुमन गणपत बाबर (वय ६०) यांनी विषारी औषध प्राशन करून आत्महत्येचा प्रयत्न केला. हा प्रकार सोमवार  (ता.१४) रात्री साडेसात वाजता कांदलगाव (ता.इंदापूर) येथे घडला. सुमन बाबर यांनी उपचारासाठी अकलूज (ता. माळशिरस, जि.सोलापूर) येथील खाजगी दवाखान्यात दाखल करण्यात आले आहे.

सुमन बाबर यांची कांदलगाव येथे शेतजमीन असून जमीनीच्या पश्चिमेस दक्षिणोत्तर गट हा त्यांचा पुतण्या पद्माकर पांडुरंग बाबर याच्या मालकीची आहे. दोन्ही गटांच्या उत्तरेस उजनी धरणासाठी संपादित गाळपेर जमीन असून या जमिनीत ऊसाचे पीक घेऊन सुमन बाबर  माळीनगर येथील 'दि सासवड माळी शुगर फॅक्टरी'त पतीच्या नावाने ऊस घालतात. मात्र, यंदा ऊस तोड आल्यानंतर पुतण्या पद्माकर याने हरकत घेत ऊसतोड थांबवून बाबर यांच्या मुलाविरूध्द खोटी केस करण्याची धमकी दिल्याने त्यांच्या मुलाने पोलिसांकडे तक्रार केली तर सुमन बाबर यांनी ऊसतोड मनाई हुकूमासाठी इंदापूर न्यायालयात दावा दाखल केला.

सराफी व्यावसायिकाचा पिस्तुलातुन गोळी झाडून आत्महत्येचा प्रयत्न

पद्माकर विरोधात सुमन बाबर इंदापूर पोलीस ठाण्यात गेल्या मात्र, पोलिसांनी त्यांना दिवसभर पोलीस ठाण्यात तिष्ठत ठेवून त्यांचा अर्ज घेतला नाही. याउलट त्यांना व सुनेला पोलिस वाहनातून पोलिस ठाण्यात आणून बसवून काही वेळानंतर गावी सोडले. त्यामुळे सुमन बाबर यांनी आत्महत्येचा प्रयत्न केल्याची माहिती त्यांचे चिरंजीव डॉ. सचिन बाबर व प्रवीण बाबर यांनी दिली. त्यामुळे पुणे जिल्हा ग्रामीण पोलीस अधीक्षक, इंदापूर पोलीस प्रमुखावर आत्महत्येस प्रवृत्त केल्याचा गुन्हे दाखल करण्यासाठी आंदोलन करण्याचा इशारा बहुजन मुक्ती पार्टीचे राष्ट्रीय महासचिव ऍड राहुल मखरे यांनी दिला. यासंदर्भात पोलीस निरीक्षक नारायण सारंगकर यांचा फोन बंद असल्याने संपर्क होवू शकला नाही.

हे ही वाचा : पुण्यातील चतुःश्रृंगी पोलिस ठाण्यात गुन्हा दाखल