पुणे : पुण्यातील निहाल सिंह आदर्श (Nihaal Singh Adarsh) या इंजिनिअरिंगला शिकणाऱ्या विद्यार्थ्याने कोरोना रुग्णांवर उपचार करणाऱ्या डॉक्टर आणि आरोग्य कर्मचाऱ्यांसाठी एक उपकरण तयार केलं आहे. यामुळे सध्या त्याची जोरदार चर्चा होत आहे. कोरोना रुग्णांवर उपचार करणाऱ्या डॉक्टरांना पीपीई किट (PPE Kit) घालावे लागते. त्यामुळे काही वेळानंतर अंगातून घामाच्या धारा येऊ लागतात. यापासून डॉक्टरांची सुटका व्हावी, यासाठी निहालने एक किट तयार केलं आहे, ज्याद्वारे पीपीई किटमधील वातावरण थंड राहील. (engineering student from Pune developed compact ventilation system for PPE kits)

मे २०२०मध्ये मुंबईच्या केजे सोमय्या इंजिनिअरिंग कॉलेजने एक प्रकल्प हाती घेतला होता. पीपीई किटमधील वातावरण थंड राहील, असे उपकरण तयार करण्याचे विद्यार्थ्यांनी ठरवले होते. हे उपकरण तयार करण्यासाठी या सर्व विद्यार्थ्यांना शिक्षकांचीही मदत मिळाली. कोव्ह-टेक असं या उपकरणाचं नाव आहे.

या किटबद्दल बोलताना निहाल म्हणाला, 'मी काहीतरी नवीन उपकरण तयार करण्याचा विचार करत होतो. कोरोना रुग्णांवर उपचार करणाऱ्या डॉक्टरांना पीपीई किट घालावे लागते आणि त्याचा त्यांना खूप त्रास होतो, हे मी पाहिलं. आणि यादृष्टीने उपकरण तयार करण्याचा विचार मी केला. माझी कल्पना कॉलेजमधील सर्वांना आवडली. आणि लॉकडाउनच्या काळात पुण्याहून मुंबईला येऊन या प्रकल्पावर काम करण्याची परवानगीही कॉलेजने दिली.'

एकदा वापर केल्यानंतर पीपीई किट ते फेकून दिले जाते. जर उपकरण वापरले तर पीपीई किट फेकून द्यावे लागणार नाही. तुम्ही कितीही वेळा पीपीई किट वापरू शकता. या उपकरणाची किंमत साडे चार हजार रुपये असून सहजरित्या ते पीपीई किटमध्ये बसवता येते. १०० सेकंदापेक्षा कमी वेळात हे उपकरण पीपीई किट वापरणाऱ्याला ताजी हवा प्रदान करण्यास सक्षम आहे, अशी माहिती निहालने दिली. निहालची आई पूनम कौर आदर्श यादेखील पेशाने डॉक्टर आहेत. आणि पुण्यातील आदर्श क्लिनिकमध्ये कोरोना रुग्णांवर उपचार करत आहेत.

पुण्यातील आणखी बातम्या वाचण्यासाठी येथे क्लिक करा.