पुणे - लग्नासाठी कमाल ५० आणि अंत्यविधीसाठी २० व्यक्तींच्या उपस्थितीचा नियम हा केवळ शहरी भागांपुरताच मर्यादित नाही. हा नियम पुणे जिल्ह्यातील ग्रामीण भागासाठीही लागू आहे. या आदेशानुसार ग्रामीण भागातही येत्या ३० एप्रिलच्या मध्यरात्री १२ वाजेपर्यंत कडक निर्बंध लागू करण्यात आलेले आहेत. त्यामुळे त्यामुळे ग्रामपंचायत, नगरपालिका, नगरपंचायती आणि कटक मंडळाच्या कार्यक्षेत्रातील नागरिकांनी या नियमांचे उल्लंघन करू नये, असे आवाहन जिल्हाधिकारी डॉ. राजेश देशमुख यांनी केले आहे.

राज्यात कोरोनाचा संसर्ग वेगाने वाढत असल्याने राज्य सरकारने ६ एप्रिलपासून कडक निर्बंध लागू केले आहेत. या निर्णयाच्या आधारे पुणे आणि पिंपरी चिंचवड महापालिकेने याबाबत स्वतंत्र आदेश काढले आहेत. या दोन्ही महापालिकांच्या धर्तीवर पुण्याचे जिल्हाधिकारी डॉ. राजेश देशमुख यांनीही ग्रामीण भागासाठी याबाबत स्वतंत्र आदेश काढला आहे.

पुण्यातील इतर बातम्या वाचण्यासाठी क्लिक करा

ग्रामीण भागातील अत्यावश्‍यक सेवांची कार्यालये आणि जीवनावश्यक वस्तूंच्या दुकानांचा अपवाद वगळता अन्य सर्व दुकाने, शाळा महाविद्यालये, मंगल कार्यालये, सलूनची दुकाने बंद ठेवण्याचा आदेश जिल्हाधिकाऱ्यांनी दिला आहे. यानुसार औषधी व किराणा दुकाने, दूध डेअरी, फळे, भाजीपाला आदींचीच दुकाने सुरू ठेवता येणार आहेत. तसेच बांधकामांच्या ठिकाणी कामगारांची निवासी सोय असलेली बांधकामे सुरु ठेवावीत, अन्य बांधकामे बंद ठेवावीत, शेतीविषयक कामे आणि शेतीसाठी आवश्‍यक असलेली खासगी वाहने जसे ट्रॅक्टर, जेसीबी, माल वाहतूक सुरू ठेवण्यास परवानगी देण्यात आली आहे.

हे वाचा - Weekend Lockdownबाबत पुण्यात सुधारित आदेश; विद्यार्थी, लग्नसभारंभ, कर्मचाऱ्यांना सूट

कामगारांचे लसीकरण किंवा चाचणी अनिवार्य दरम्यान, उद्योग क्षेत्रात किंवा विविध दुकानांमध्ये काम करत असलेल्या सर्व कामगारांचे कोरोना लसीकरण लवकरात लवकर पूर्ण करावे. ज्यांचे लसीकरण होणार नाही, अशा कामगारांनी कोरोनाची आरटीपीसीआर चाचणी करून घेणे अनिवार्य करण्यात आले आहे.