पुणे: वस्तीमधील सार्वजनिक शौचालयाजवळ पत्ते खेळणाऱ्यांबाबत पोलिसांकडे तक्रार केल्याच्या रागातून सराईत गुन्हेगारांनी साथीदारांच्या मदतीने कुटुंबावर चाकूने हल्ला केला. सात वर्षाच्या मुलीवरही चाकूने वार केल्यामुळे मुलगी गंभीर जखमी झाली आहे. हा धक्कादायक प्रकार रविवारी दुपारी चार वाजता रामटेकडी येथे घडला. याप्रकरणी वानवडी पोलिसांनी तिघांना अटक केली आहे. 

करण सुंदरलाल वाल्मिकी (वय 20), पापा वाघेला (वय 19) आणि साहिल र्फ लड्डू वाघेला (वय 19, सर्व रा. रामटेकडी , हडपसर) अशी अटक केलेल्यांची नावे आहेत. याप्रकरणी बेबी सूरज पाटोळे (वय 40) यांनी वानवडी पोलिस ठाण्यात फिर्याद दिली आहे. पोलिसांनी दिलेल्या माहितीनुसार, फिर्यादी बेबी पाटोळे या त्यांच्या कुटुंबासह रामटेकडी परिसरात राहतात. वस्ती असल्यामुळे सार्वजनिक शौचालयाचा नागरिकांकडून वापर केला जातो. दरम्यान, संबंधीत सार्वजनिक शौचालयासमोरच आरोपी करण वाल्मिकी व त्याचे साथीदार पत्ते खेळत होते.

Video : खासदार अमोल कोल्हेंनी काढले केंद्र सरकारचे वाभाडे; लोकसभेतील भाषण व्हायरल 

दरम्यान, फिर्यादी यांच्या भावाची सात वर्षांची मुलगी त्यांच्याघरी खेळण्यासाठी आली होती. त्याचवेळी आरोपी सार्वजनिक शौचालयासमोर पत्ते खेळत होते. त्यामुळे फिर्यादी व त्यांचे पती सुरज पाटोळे यांनी आरोपींना शौचालयासमोर पत्ते खेळू नयेत, असे सांगितले. त्यामुळे त्यांच्यात वाद वाढल्याने आरोपींनी त्यांना शिवीगाळ केली. त्यावेळी फिर्यादी या आरोपींविरुद्ध पोलिस चौकीत तक्रार देण्यासाठी गेल्या होत्या. पोलिसात तक्रार देण्यासाठी गेल्याने आरोपींना राग आला. त्यामुळे आरोपींनी रविवारी दुपारी चार वाजण्याच्या सुमारास फिर्यादीच्या घरी येऊन त्यांना व त्यांच्या पतीला शिवीगाळ करण्यास सुरूवात केली. तसेच सुरज पाटोळे यांना लाथाबुक्‍क्‍यांनी मारहाण केली. त्यानंतर करणने हातातील चाकूने सुरजवर वार करण्याचा प्रयत्न केला. फिर्यादीच्या भावाची सात वर्षांची मुलगी तेथे होती. सुरजने त्याच्यावर होणारा चाकूचा वार चुकविला. त्यामुळे चाकूचा वार फिर्यादीच्या भावाच्या मुलीवर बसला. त्यामध्ये मुलगी गंभीर जखमी झाली.