लोणी काळभोर (पुणे) : जिल्हा परीषदेच्या लोहगाव (ता. हवेली) येथील प्राथमिक शाळेतील एक पुरुष शिक्षक मागील दीड वर्षापासून मानसिक त्रास देत असल्याची तक्रार त्याच शाळेतील महिला शिक्षिकेने हवेली पंचायत समितीच्या शिक्षण विभागाकडे केली आहे. त्रास देणाऱ्या पुरुष शिक्षकाच्या विरोधात पुराव्यासह वारंवार तक्रारी केल्याचा दावा संबधित शिक्षिकेने पंचायत समितीच्या शिक्षण विभागाला दिलेल्या तक्रारीत केला आहे. 

दरम्यान, तक्रारकर्त्या शिक्षिकेस मागील चार दिवसांपासून सर्दी, अंगदुखी, ताप यासारखी कोरोनाची लक्षणे जाणवू लागली आहेत. मात्र वारंवार तक्रार करुनही संबधित शिक्षकावर कारवाई होत नसल्याच्या निषेधार्थ तक्रारकर्त्या महिला शिक्षिकेने, कोविडची चाचणी करण्यास अथवा कोविडचा उपचार घेण्यास नकार दिल्याने शिक्षण खात्यात एकच खळबळ उडाली आहे. 

पुण्यातील इतर बातम्या वाचण्यासाठी क्लिक करा

लोहगाव परीसरातील एका वस्ती शाळेवर अनिता व सुधीर (दोघांचीही नावे बदलली आहेत) मागील काही वर्षांपासून शिक्षक म्हणून काम करतात. मात्र मागील दीड वर्षांपासून सुधीर हा छोट्या-छोट्या कारणावरुन कामात अडवणूक करण्याबरोबरच मानसिक त्रास देत असल्याचा आरोप अनिता यांनी हवेली पंचायत समितीचे गटशिक्षण अधिकारी रामदास वालझडे यांच्याकडे लेखी स्वरुपात केला आहे. मात्र मागील चार दिवसांपासून अनिताला सर्दी, अंगदुखी, ताप यासारखी कोरोनाची लक्षणे जाणवू लागली आहेत. मात्र तक्रारीची चौकशी पुर्ण होऊन, संबधित शिक्षकावर कारवाई होत नाही तोपर्यंत कोविडची चाचणी करण्यास अथवा कोविडचा उपचार घेण्यास नकार दिल्याने, शिक्षण खात्यात एकच खळबळ उडाली आहे.

याबाबत अधिक माहिती देतांना नाव बदललेल्या अनिता या शिक्षिका म्हणाल्या, सुधीर व मी याच शाळेत मागील कांही वर्षांपासून काम करत आहोत. मात्र मागील दीड वर्षांपासून सुधीर छोट्या-मोठ्या नाहक मानसिक त्रास देत आहेत. सुरुवातीला समजून सांगण्याचा प्रयत्न केला होता. मात्र सुधीरच्या वागण्यात बदल होत नसल्याने, सुधीरच्या त्रासाबद्दल अगदी पुराव्यासह गटविकास अधिकाऱ्यांच्या लेखी तक्रारी केलेल्या आहेत. मात्र पुराव्यासह तक्रारी देऊनही, वरीष्ठ अधिकारी सुधीर यांना पाठीशी घालत असल्याचे दिसून आले आहे. यामुळे माझी मानसिक स्थिती बिघडण्यास सुरुवात झाली आहे. चार दिवसांपासून कोरोनाची लक्षणे आढळू लागली असली तरी, सुधीर यांच्या विरोधात दिलेल्या तक्रारीची चौकशी होऊन कारवाई झाल्याशिवाय कोविडची चाचणी करणा नाही अथवा कोविडवरील उपचारही घेणार नाही असेही अनिता यांनी स्पष्ठ केले आहे. 

दरम्यान, याबाबत सुधीर यांच्यांशी संपर्क सांधला असता, सुधीर म्हणाले, अनिता या आमच्याच शाळेतील सहकारी शिक्षिका असून, त्यांना कोणत्याही प्रकारचा त्रास दिलेला नाही. अनेक वेळा शाळेत उशीरा आल्यानंतर, त्यांना सही करण्यास नकार दिल्यानेच अनिता यांनी माझ्याविरोधात खोट्या व बिनबुडाच्या तक्रारी केल्या आहेत. शइक्षक विभागाकडून होणाऱ्या कोणत्याही प्रकारच्या चौकशीस सोमोरी जाण्याची तयारी असल्याचेही, सुधीर यांनी स्पष्ट केले. 

हे वाचा - देशात महाराष्ट्र बनला कोरोनाचा हॉटस्पॉट; पुणे, मुंबई, नागपूरमध्ये वेगानं फैलाव

दोषी आढळल्यास कारवाई करणार : गटशिक्षण अधिकारी-अनिता यांनी दिलेल्या तक्रारीबद्दल बोलताना हवेली पंचायत समितीचे गटशिक्षण अधिकारी रामदास वालझडे म्हणाले, ''लोहगाव येथील महिला शिक्षेकेच्या तक्रारीवरुन, संबधित पुरुषाची चौकशी करण्यासाठी चार जणांची चौकशी समिती नेमली आहे. ही समिती पुढील ४८ तासात चौकशी अहवाल देणार आहे. हा चौकशी अहवाल वरीष्ठ कार्यालयाला पाठवण्यात येणार आहे.''