पुणे : शेतीमालाचे कमी झालेले भाव... रासायनिक खतांच्या वधारलेल्या किमती....डिझेल महागल्याने मशागतींच्या दरात झालेली वाढ...अल्प पाऊस व ढगाळ हवामानामुळे दिवसेंदिवस वाढत्या रोगांचा प्रादुर्भाव.... त्यामुळे करावी लागणारी महागलेल्या औषधांची फवारणी...या चक्रव्यूहात सध्या जिल्ह्यातील बळिराजा अडकल्याने हवालदिल झाला आहे. वाढत्या औषधे, खतांच्या किमतींमुळे आर्थिक भुर्दंड सहन करावा लागत असल्याने शेतकरी मेटाकुटीला आला आहे.

कोरोनाच्या पार्श्वभूमीवर प्रत्येकी पन्नास किलोच्या पिशव्यानुसार संयुक्त व मिश्र खतांच्या दर १०० ते २०० रुपयांनी गेल्या वर्षीच्या तुलनेत महागले आहे. वाढलेल्या खतांच्या किमतीचा विचार करता एका टनामागे सरासरी दोन हजार रुपयांपेक्षा अधिक वाढ झालेली आहे. त्यातच भर म्हणून शिरूर तालुक्याच्या पूर्व भागातील रांजणगाव सांडस, आलेगाव पागा, नागरगाव, उरळगाव, दहिवडी पारोडी आदी गावात नत्र (युरिया) खताचा मोठ्या प्रमाणात तुटवडा जाणवत आहे.

ऊस ,कांदा, तरकारी पिकांना योग्य बाजारभाव मिळत नाही. उत्पादन व खर्च यांचा ताळमेळ बसत नाही. त्यामुळे सरकारने शेतीच्या कामासाठी लागणाऱ्या डिझेल व पेट्रोल तसेच रासायनिक खतास, औषधाच्या दरात सवलत किंवा अनुदान देणे गरजेचे आहे.

- भीमराव काळभोर, शेतकरी- रांजणगाव सांडस

दोन-तीन महिने स्वतःच्या मुलाप्रमाणे जिवापाड जपलेल्या पिकाला सध्या कवडीमोल बाजार भाव मिळत आहे. रात्रंदिवस कष्ट करून हातातोंडाशी आलेले पीक वाढीव खर्चामुळे सोडून देण्याची वेळ शेतकऱ्यांवर आली आहे.

- हरिभाऊ रणदिवे, शेतकरी, रांजणगाव सांडस (ता. शिरूर)

शेतकऱ्यांना असा बसतोय फटका

• विक्री व उत्पादन खचामध्ये मोठी तफावत

• डिझेल दरवाढीमुळे मशागतीचे दर वधारले

• मजुरीसह वाहतूक खर्चात वाढ

• लहरी हवामानामुळे फवारणीचा खर्च अधिक

व्यापारीच होतोय मालामाल

टोमॅटो, भेंडी, मिरची, कोबी, फ्लॉवर आदी पिकांना कवडीमोल बाजारभाव तसेच भाजीपाल्याला सुद्धा कमी भाव मिळत आहे. तरीदेखील भाजी विक्री करणाऱ्या व्यापाऱ्यांकडून चांगल्या दराने भाज्यांसह तरकारी मालाची विक्री होत आहे. शेतकऱ्याला वाढीव खर्चाने पिके सोडून देण्याची वेळ आली आहे. मात्र, व्यापारी ग्राहकाकडून जादा दराने विक्री करत आहे. यामुळे व्यापारीच मालामाल होत असल्याचे विदारक चित्र बाजारात आहे.