पिंपरी (पुणे) - आई वडिलांनी बाधलेल्या खोलीत राहून त्यांचाच छळ करणाऱ्या मुलास निगडी पोलिसांनी अखेर घराबाहेर काढले. विविध सामाजिक कार्यकर्त्यांनीही याबाबत महत्त्वाची भूमिका बजावली.

शशिकला आणि एकनाथ देवगडकर या वृद्ध दांपत्याने आकुर्डी येथे काबाडकष्ट करून खोल्या बांधल्या. खोल्या भाड्याने देऊन त्यातून ते आपली उपजिविका चालविणार होते. आई वडिलांना सांभाळणे तर दूरच परंतु त्याच्या खोलीत मुलाने आपला संसार थाटला. आई वडिलांनी ठेवलेल्या भाडेकरूंना त्रास देऊन पळवून लावले. यामुळे घरखर्च कसा करायचा, असा प्रश्न त्यांच्यासमोर निर्माण झाला. 

मुलाच्या विरोधात त्यांनी तहसीलदाराकडे दाद मागितली. उपविभागिय न्यायदंडाधिकाऱ्यांनी एका महिन्यात खोली खाली करण्याची मुदत दिली. ती मुदत २८ डिसेंबर २०१८ रोजी संपुष्टात आल्यावरही मुलाने खोली खाली केली नाही. ही कैफियत त्यांनी दै.'सकाळ'कडे मांडल्यावर याबाबत १४ जानेवारी रोजी 'आम्ही न्याय कोणाकडे मागायचा?' या शिर्षकाखाली बातमी प्रसिध्द झाली.

या बातमीची दखल सामाजिक कार्यकर्ते बाबा कांबळे, युवराज दाखले, श्रीधर काळे, उर्मिला काळभोर, नीता परदेसी यांनी घेतली. मुलाला घराबाहेर काढण्यासाठी त्यांनी पोलिसांवर दबाव निर्माण केला. वरिष्ठ पोलिस अधिकाऱ्यांनी याबाबत निगडी पोलिसांना कारवाईबाबत सुचना दिल्या.

मुलानेही आपल्या ओळखीचा पुरेपूर वापर करीत ही कारवाई थांबविण्याचा प्रयत्न केला. मात्र सामाजिक दबाव वाढल्यामुळे मुलाने गुरूवारी (ता.१७) खोली खाली केली.

"उपविभागीय न्यायदंडाधिरी, सामाजिक कार्यकर्ते आणि पोलिस यांचे मी आभारी आहे. दै.'सकाळ'ने आमच्यावरील अन्यायाला वाचा फोडली नसती तर कदाचित आमची दखल कोणी घेतलीच नसती. त्यामुळे दै.सकाळचे विशेष आभारी आहोत."
शशिकला एकनाथ देवगडकर