पिंपरी - अवघा अडीच फुटांचा पदपथ आणि तोही फेरीवाल्यांनी बळकावला. ४० फुटी रस्त्याच्या दुतर्फा फेरीवाले, खरेदीसाठी आलेल्या ग्राहकांनी हातगाडीसमोरच वाहने पार्क केलेली, यामुळे आधीच अरुंद असलेला वाकडमधील दत्त मंदिर रस्ता आणखीन अरुंद झाला आहे. त्यामुळे या रस्त्यावरून चालायचे कसे आणि वाहन चालवायचे कसे, असा प्रश्‍न येथील नागरिकांना पडला आहे.

वाकड चौक ते डांगे चौक रस्ता हा वाकड-दत्त मंदिर रस्ता विकास आराखड्यात ४५ मीटरचा असून, प्रत्यक्षात तो २४ मीटरचा विकसित केला आहे. काही ठिकाणी तो २० मीटरचा आहे. हा रस्ता पूर्ण रिकामा असेल तर एकावेळी एका लेनमधून दोन अवजड वाहने जाऊ शकतात. मात्र, रस्त्यावरील अतिक्रमणामुळे एक वाहन कसेतरी जाते. याकडे महापालिकेचे दुर्लक्ष आहे.

दत्त मंदिर या रस्त्यावर दुतर्फा अवघा अडीच फुटांचा पदपथ आहे. त्यावर गॅरेज, चप्पल, गादी, उसाचे गुऱ्हाळ, भाजी, खाद्यपदार्थ विक्रेते यांनी अतिक्रमण केले आहे. त्यामुळे नागरिकांना गर्दीतून चालावे लागते.

हॉकर्स झोनचे स्वरूप
वाकड चौक ते डांगे चौकदरम्यान फेरीवाल्यांनी पदपथालगतच्या रस्त्यावर हातगाड्या लावल्या आहेत. १२७ हातगाड्या या मार्गावर असल्याने परिसराला हॉकर्स झोनचे स्वरूप आले आहे. सायंकाळी आयटी कंपन्या सुटल्यावर रहदारी वाढते. त्यामुळे कोंडीत भर पडते. 

पदपथ खुला करावा
दत्त मंदिर रस्ता २४ मीटरचा असून, अतिक्रमणांमुळे तो १० मीटरसुद्धा वापरासाठी राहत नाही. त्यामुळे महापालिकेने येथील पदपथ पादचाऱ्यांसाठी खुला करावा, अशी मागणी सुधीर देशमुख यांनी केली आहे. 

दत्त मंदिर रस्ता ४५ मीटर करण्यासाठी काही जागा पालिकेच्या ताब्यात आल्या आहेत. मात्र, तेथे अतिक्रमण झाले आहे. काही दिवसांत पदपथावर अतिक्रमण विरोधी कारवाई करून जागा ताब्यात घेणार आहे.
- सतीश इंगळे, कार्यकारी अभियंता