पुणे : पावसाळा आला की तळजाई परिसरात पूरजन्य परिस्थिती निर्माण होते. अशा वेळी पाणी जमिनीतच मुरावे, यासाठी जलसंधारणाची कामे करण्यात येत आहे. तसेच तेथील परिसंस्थेला निरुपयोगी असलेली गिरीपुष्प (ग्लिरिसिडीया) ही झाडे काढून देशी वृक्षांची लागवड केली जात आहे, अशी माहिती पुणे वन विभागाच्या वतीने देण्यात आली आहे. तळजाई टेकडीवर चालू असलेल्या विविध कामांमुळे नागरिकांमध्ये संभ्रमाची अवस्था आहे. वनसंधारणाच्या दृष्टीने ही सर्व कामे चालू असल्याचे उपवनसंरक्षक राहुल पाटील यांनी सांगितले. ते म्हणाले, ‘‘दरवर्षी पावसाळ्यात या ठिकाणी पुराच्या परिस्थितीमुळे नागरिकांची मोठी असुविधा होते.

तसेच जीवितहानीची समस्यादेखील गंभीर असल्यामुळे याबाबत वन विभागाला उपाययोजना करण्याचे आवाहन करण्यात आले. त्यास प्रतिसाद देत आम्ही टेकडी परिसराची निरीक्षणे केली असून आवश्‍यक त्या सर्व उपाययोजना करत आहोत.’’ ही सर्व कामे नागरिकांना होत असलेल्या असुविधेच्या पार्श्वभूमीवर करण्यात येत आहे. त्यामुळे टेकडी परिसरातील रहिवाश्यांनी याबाबतचे संभ्रम दूर करावे असे आवाहन वन विभागाने केले.