दौंड  : दौंड नगरपालिकेचे माजी नगराध्यक्ष व विद्यमान स्वीकृत नगरसेवक प्रेमसुख कटारिया यांच्या वाहनाचा बुधवारी पहाटे दौंड शहरातून जाणार्या राष्ट्रीय महामार्गावर अपघात झाला. अपघातानंतर वाहनातील एअरबॅग उघडल्याने कटारिया बचावले. दौंड एसआरपीएफ विश्रामगृहाच्या संरक्षक भिंतीला त्यांचे वाहन जोरात धडकले.

- पुण्याच्या बातम्या वाचण्यासाठी येथे ► क्लिक करा

मनमाड-नगर-दौंड-बेळगाव राष्ट्रीय महामार्गावर महामार्गावर १० मार्च रोजी पहाटे तीन वाजता हा गंभीर अपघात झाला. प्रेमसुख किसनदास कटारिया (वय ७८) हे त्यांच्या इनोव्हामधून जात असताना हा अपघात झाला.

वेगातील त्यांचे वाहन राज्य राखीव पोलिस दल (एसआरपीएफ) गट क्रमांक पाचच्या मुख्यालयासमोरील 'शौर्य' नामक विश्रामगृहाची संरक्षक भिंत तोडून आत घुसले. महामार्गापासून विश्रामगृह खाली असल्याने वाहन अधांतरी होते. अपघातानंतर मोठा आवाज आल्याने एसआरपीएफ मुख्यालयात बंदोबस्तावरील पोलिस कर्मचार्यांनी त्वरीत तिथे धाव घेतली. अपघातानंतर त्वरीत एअरबॅग उघडल्याने ते बचावले. 

गजा मारणे मिरवणूक प्रकरण : गुंड समर्थकांचं फोन रेकॉर्ड पोलिस तपासणार

अपघात झालेल्या ठिकाणी महामार्ग अरूंद आहे. प्रेमसुख कटारिया यांच्या हनुवटीजवळील भागात टाके टाकल्यानंतर व डोक्याला मलमपट्टी केल्यानंतर त्यांना रूग्णालयातून घरी सोडण्यात आले आहे. सलग ४९ वर्षे नगरसेवक असणारे प्रेमसुख कटारिया यांच्या धाकट्या सूनबाई शीतल योगेश कटारिया या दौंडच्या विद्यमान नगराध्यक्षा आहेत. 

(संपादन : सागर डी. शेलार)