पुणे : जी २० परिषद संपली म्हणून पुन्हा शहराचे स्वच्छतेकडे दुर्लक्ष होऊ नये यासाठी वेळीच्या वेळी स्वच्छता करा असे आदेश महापालिका प्रशासनाला आदेश देण्यात आले आहेत. तसेच जे नागरिक रस्त्यावर थुंकून घाण करणार आहेत, त्यांच्यावरची कारवाईही बंद होणार नाही.

गेल्या ८ दिवसात ३५३ जणांवर कारवाई करून ३ लाख ५३ हजाराचा दंड वसूल केला आहे. शहरात गेल्या दोन महिन्यापासून ‘जी २०’ परिषदेची पहिली बैठक पुण्यात झाली. या बैठकीसाठी १८ सदस्य देश, ८ निमंत्रित देश व ८ आंतरराष्ट्रीय संस्थांचे एकूण ६४ प्रतिनिधी उपस्थित होते. या बैठकीसाठी परदेशातील उच्चपदस्थ अधिकारी येणार त्यामुळे शहर स्वच्छ करण्याचे मोठे आव्हान महापालिका प्रशासनासमोर होते.

महापालिका आयुक्तांसह जिल्हाधिकारी, विभागीय आयुक्त, केंद्र शासनातील अधिकाऱ्यांनी लोहगाव विमानतळ ते सेनापती बापट रस्त्यावरील जे. एल्ब्यू. मेरिएट हॉटेल दरम्यान अनेकदा पाहणी केली. खड्डे बुजविणे, पादचारी मार्ग दुरुस्त करणे, राडारोडा कचरा उचलणे यासह रंगरंगोटीकडे लक्ष देण्यात आले होते.

पण महापालिकेने स्वच्छता केल्यानंतर बेशिस्त नागरिक रस्ते, पादचारी मार्ग, दुभाजकावर पान, गुटखा खाऊन थुंकून घाण करत आहेत. हे प्रकार थांबत नसल्याने प्रशासनाने कारवाईचा बडगा उचलला होता. नागरिकांना रंगेहाथ पकडून १ हजार रुपयांचा दंड वसूल केला. पैसे नसतील तर त्यांना स्वतःला रस्ता स्वच्छ करण्यास भाग पाडले होते.

‘‘जी २०’ परिषद झाली तरीही सार्वजनिक ठिकाणी थुंकणाऱ्यांकडून दंड वसूल करण्याची कारवाई सुरू राहणार आहे. बुधवारी २६ जणांकडून २६ हजार रुपयांचा दंड वसूल केला आहे. तर १० ते १८ जानेवारी या कालावधीत ३५३ जणांवर कारवाई केली. त्यांच्याकडून ३ लाख ५३ हजार रुपये दंड वसूल केला आहे. नागरिकांनी सार्वजनिक ठिकाणी घाण करून शहर अस्वच्छ करू नये.’’

- आशा राऊत, उपायुक्त, घनकचरा विभाग