समाधान काटे

Latest ShivajiNagar News : शिवाजीनगर येथील गणेशखिंड रस्त्यावर जागोजागी खड्डे पडल्याने रस्त्यावर खडी पसरली आहे. धुळीचे प्रमाणही वाढल्याने वाहनचालकांना कसरत करून वाहन चालवावे लागते. खडीवरून घसरून अनेक दूचाकींचे अपघात झाले आहेत. कॅासमॅास बॅंक ते सवित्रीबाई फुले पुणे विद्यापीठ चौक या रस्त्याची अत्यंत दैनीय अवस्था झाली आहे.

जागोजागी खड्डे पडल्याने, पाऊस पडल्यावर वाहनचालकांना खड्डयांचा आंदाज येत नाही, त्यामुळे अनेक दूचाकी खड्यात पडल्यावर बंद पडतात. बंद पडलेल्या वाहनामुळे वाहतूक संथ होऊन, दीड ते दोन किलोमीटर वाहनांच्या रांगा लागतात.

याचा फटका प्रवाशांना बसतो, वेळेत पोहचता येत नाही. रस्त्यवरची धूळ वाहनचालकांच्या डोळ्यात, नाकात, तोंडात जाऊन प्रवाशांना श्वासनाचे आजार होतात. कित्येक महिन्यापासून प्रवसी वरिल समस्यांना तोंड देत असून याकडे प्रशासनाचे दुर्लक्ष होत असल्याने संतप्त प्रवासी, स्थानिक रहिवासी सुहास अनगळ यांच्यासह इतर रहिवाशांनी 'सकाळ'कडे कैफियत मांडली.

चिखल तुडवत पादचाऱ्यांचा प्रवास

कॅासमॅास बॅंक ते सेनापती बापट रस्ता या मार्गवर पदपथ शिल्लक राहिला नाही. रस्त्याच्या बाजूला सिंमेटचे ब्लॅाक, कचरा, माती, राडारोडा, केबल, झाडांच्या फांद्या, खडी पसरलेली आहे. या ठिकाणी नियमित सांडपाणी रस्त्यावरून वाहते. पादचारी मार्ग शिल्लक रहिला नसल्याने विद्यार्थी, महिला, जेष्ठ नागरिकांना रस्त्याच्या बाजूने चिखल तुडवत चालावे लागते.

"सांडपाणी (ड्रेनेज)ची झाकणं खराब झाल्याने रस्त्यावरून दुर्गंधीयुक्त पाणी वाहते. कॅासमॅास बॅंकेच्या समोर वळणावर वॅार्डन सोबत कायम स्वरूपी वाहतूक पोलिस असावा. रस्यावर पडलेले खड्डे तात्काळ दूरूस्त करावे, पादचारी मार्गचे काम मार्गी लावावे.या मार्गावरून लहान बस सुरू केल्या तर वाहतूक कोंडी कमी होईल.

- संजय जाधव, अध्यक्ष चतुःशृंगी नागरिक कृती समिती

"प्रशासकीय अधिकारी, स्थानिक लोकप्रतीनिधींचे या भागाकडे लक्ष नाही. खड्डे, वाहतूक कोंडीमुळे येथील व्यावसायिकांचे मोठ्या प्रमाणात नुकसान होत आहे. अनगळवाडी येथील पाच ते सहा हजार नागरिकांना याचा फटका बसतो.

- भगवान देशपांडे, अध्यक्ष चतु: र्शुंगी मित्र मंडळ ट्रस्ट

" मेट्रोच्या आजूबाजूचे काम करण्याची जबाबदारी मेट्रोची आहे. सध्या मेट्रोचे काम जोरात सुरू असल्याने क्रेन, गार्डर यामुळे रस्त्यावर खड्डे पडतात. याकडे मेट्रो अजिबात लक्ष देत नाही. पदपथाचे काम मार्गी लावण्यासाठी अधिकाऱ्यांना सुचना देतो."

- अनिरूद्ध पावसकर, मुख्य अभियंता, पथ विभाग महापालिका