पुणे - बदलापूर (जि. ठाणे) येथे विक्रीसाठी गाडीमधून गांजा घेऊन जाणाऱ्या दोघांना सीमाशुल्क विभागाच्या अमली पदार्थविरोधी पथकाने अटक केली. त्यांच्याकडून ३१ लाख रुपये किमतीचा गांजा व २२ लाख रुपयांची गाडी असा एकूण ५३ लाखांचा ऐवज जप्त केला. नगर- कल्याण महामार्गावरील डोंबारवाडी टोल नाक्‍यावर ही कारवाई करण्यात आली.  

अंकुश भीमराव पाडुळे (रा. आष्टी, जि. बीड) व नितीन पिराजी आंबेकर (रा. उल्हासनगर, जि. ठाणे) अशी अटक करण्यात आलेल्या संशयित आरोपींची नावे आहेत. सीमाशुल्क विभागाच्या सहआयुक्त वैशाली पतंगे यांनी दिलेल्या माहितीनुसार, अमली पदार्थविरोधी पथकास दोघे जण बुधवारी इनोव्हा गाडीमधून हा गांजा विक्रीसाठी घेऊन जात असल्याची खबर मिळाली. त्यानुसार पथकाने आळेफाट्याजवळ असलेल्या डोंबारवाडी टोल नाक्‍यावर सापळा रचला. त्या वेळी या ठिकाणी या गाडीची तपासणी केली असता तिच्यामध्ये १६५ किलो वजन असलेली एकूण सात गांजाची पोती आढळून आली. 

माहिती देणाऱ्यास बक्षीस 
शहर व जिल्ह्यामध्ये गांजा विक्री करण्याचे प्रकार उघडकीस येत आहेत. याबाबत माहिती मिळाल्यास नागरिकांनी ती सीमाशुल्क विभागास ०२०- २६०५१८०४ किंवा ०२०- २६०५१८४८ या दूरध्वनी क्रमांकावर द्यावी. माहिती देणाऱ्यास सरकारकडून योग्य ते बक्षीस देण्यात येईल, असे वैशाली पतंगे यांनी सांगितले.