मंचर : विद्यार्थ्यांच्या विविध दाखल्यांसाठी जुलै महिन्या अखेर पर्यंत शनिवारी व रविवारी शासकीय सुट्टीच्या दिवशी आंबेगाव व जुन्नर तालुक्यातील ५५ महा-ई-सेवा केंद्र सुरू राहतील. तसेच जुन्नर व आंबेगाव तहसील कार्यालय व मंचर उपविभागीय अधिकारी कार्यालयातील संबधित अधिकारी व कर्मचारी शनिवारी उपस्थित राहणार आहेत. त्यामुळे विद्यार्थ्यांचे दाखले वेळेत मिळू शकतील.”

अशी माहिती आंबेगाव व जुन्नर विभागाचे प्रांत अधिकारी गोविंद शिंदे यांनी दिली. ते म्हणाले “आंबेगाव व जुन्नर तालुक्यात जवळपास ५५ महा-ई सुविधा केंद्र आहेत. महाविद्यालयीन प्रवेश, विविध विभागांच्या भरतीसाठी आवश्यक असलेला उत्पन्नाचा, जातीचा, नॉन-क्रिमिलेअर, आर्थिक दृष्ट्या मागास आदी प्रमाणपत्रांची आवश्यकता आहे. हे दाखले विद्यार्थ्यांना वेळेत उपलब्ध व्हावेत. अश्या सूचना महा-ई सुविधा केंद्र चालकांना दिल्या आहेत. त्याचेही चांगले प्रशासनाला सहकार्य मिळत आहे.”

“अवसरी खुर्द, मंचर, घोडेगाव, जुन्नर, ओतूर, बेल्हा, आळेफाटा आदी एकूण ५५ महा-ई सुविधा केंद्रामध्ये शनिवारी (ता.१५) पालक व विद्यार्थ्यांची गर्दी झाली होती.दररोज ४०० हून अधिक दाखले वितरीत केले जातात.”असे प्रांत कार्यालयातील नायाब तहसीलदार सचिन मुंडे यांनी सांगितले.