पुणे - सुदृढ आरोग्याचा आणि निरोगी जीवनशैलीचा संदेश देण्यासाठी आयोजित ‘लाइफलाँग रिटेल ग्रीन राइड ३.०’ या सायकल प्रवासाला पुण्यातून प्रारंभ झाला. या उपक्रमांतर्गत फिटनेस आयकॉन आणि मॉडेल मिलिंद सोमण हे सायकलवरून विविध शहरांमधून सुमारे ६५० किलोमीटरचा प्रवास करणार आहेत.

सोमण यांनी पत्रकार परिषदेत ही माहिती दिली. याप्रसंगी ‘लाइफलाँग ऑनलाइन रिटेल प्रा. लि.’चे सह-संस्थापक भरत कालिया उपस्थित होते. १८ डिसेंबरला बंगळुरू येथे या एकल सायकल प्रवासाचा समारोप होणार आहे. या प्रवासात वाहतुकीच्या पर्यावरणपूरक साधनांना प्रोत्साहन देण्यासाठी सोमण १०० किलोमीटरचा प्रवास इलेक्ट्रिक स्कूटरवर देखील करणार आहेत.

सोमण म्हणाले, ‘‘सलग तिसऱ्या वर्षी ग्रीन राइड उपक्रमात सहभाग घेताना मला आनंद होत आहे. फिटनेसमुळे वैयक्तिक आरोग्य व पर्यावरणावर होणारे सकारात्मक परिणाम लोकांसमोर आणण्यासाठीचा प्रयत्न म्हणून मी या मोहिमेकडे पाहतो. निरोगी आयुष्यासाठी व्यायामाला पर्याय नाही.

त्यासाठी प्रत्येकाने दिवसातील काही वेळ तरी स्वतःसाठी द्यायलाच हवा. आज अनेक व्यक्ती माझ्याकडे फिटनेसचे एक आदर्श उदाहरण म्हणून पाहतात, पालक त्यांच्या मुलांना माझे उदाहरण देतात. मात्र प्रत्येक व्यक्तीने स्वतः मेहनत घेत आपल्या मुलांसाठी आदर्श उदाहरण ठरावे, अशी माझी इच्छा आहे. हाच संदेश मी या उपक्रमातून देणार आहे.’