पुणे - ‘मौखिक संवाद ते डिजिटल संवादाच्या (Digital Communication) प्रवासात लेखन परंपरा आली. मात्र, लेखन परंपरा जोपासण्याच्या प्रयत्नात आपण चित्रसंवाद, ध्वनिसंवाद, संवेदना, दुसऱ्या भाषा मागे टाकल्या. आजच्या शिक्षणात (Education) केवळ शब्दांची भाषा आहे. त्यामुळे शिक्षणातील संवेदनांची वाढ खुंटली,’ असे मत ज्येष्ठ अभिनेते डॉ. मोहन आगाशे (Dr Mohan Aagashe) यांनी व्यक्त केले.

सावित्रीबाई फुले पुणे विद्यापीठाच्या ७३ व्या वर्धापनदिनानिमित्त आयोजित कार्यक्रमात ते बोलत होते. या वेळी कुलगुरू डॉ. नितीन करमळकर, प्र-कुलगुरू डॉ. एन. एस. उमराणी, कुलसचिव डॉ. प्रफुल्ल पवार, परीक्षा व मूल्यमापन मंडळाचे संचालक महेश काकडे, वित्त व लेखा अधिकारी शिल्पा भिडे, व्यवस्थापन परिषद सदस्य, अधिसभा सदस्य आदी उपस्थित होते. या वेळी शैक्षणिक व सामाजिक क्षेत्रात काम करणाऱ्या भारती ठाकूर, आयुर्वेद विषयात काम असणारे डॉ. सदानंद सरदेशमुख, शिक्षणाच्या क्षेत्रात कार्यरत असणारे डॉ. एम. स. गोसावी, शैक्षणिक व सामाजिक कामात नावलौकिक मिळवलेले डॉ. राधाकृष्ण विखे पाटील, सामाजिक क्षेत्रात काम करणाऱ्या ज्योती देशमुख, सामाजिक व सहकार क्षेत्रातील रमेश थोरात, विद्यापीठाचे माजी कुलगुरू आणि शिक्षणतज्ज्ञ डॉ. अरुण अडसूळ, सामाजिक आणि सहकार क्षेत्रातील प्रमोद कांबळे, निवेदक आनंद देशमुख आदींना जीवनगौरव पुरस्काराने सन्मानित करण्यात आले. तर विद्यापीठाकडून देण्यात येणाऱ्या युवा गौरव पुरस्कारांमध्ये विनायक लष्कर यांना सामाजिक कार्यासाठी, लेखिका मनस्विनी लता रवींद्र यांना साहित्य क्षेत्रातील, कला क्षेत्रात चिंतन उपाध्याय, तर क्रीडा क्षेत्रातील पुरस्कार टेनिसपटू अंकिता रैना यांना प्रदान करण्यात आला.

कार्यक्रमात विद्यापीठाचे व्हिजन डॉक्युमेंट, विद्यापीठ वर्धापनदिन विशेषांक आणि दुर्मीळ व्याख्यानांच्या सीडीचे प्रकाशन करण्यात आले.

डॉ. करमळकर म्हणाले, ‘‘विद्यापीठात क्रिडा संकुलापासून ते सावित्रीबाई फुले यांच्या पूर्णाकृती पुतळ्याचे कामही आता पूर्ण होत आहे. पारंपारिक ज्ञान आणि आधुनिक तंत्रज्ञानाची सांगड घालण्याची आवश्यकता आहे. आंतरविद्याशाखीय, समाजाभिमुख शिक्षण आणि संशोधनासाठी प्रयत्न केले जात आहे.’’

भाषेपलीकडे ध्वनीची, चित्रांची आणि असंख्य प्रकारच्या भाषा आहेत. ज्या आपण शिकलो तरच आपलं आयुष्य समृद्ध होईल. औपचारिक शिक्षणात या सर्व भाषांचा समावेश होणे गरजेचे आहे.

- डॉ. मोहन आगाशे, ज्येष्ठ अभिनेते

विद्यापीठाने ७३ वर्षांच्या प्रवासात अनेक राष्ट्रीय व आंतरराष्ट्रीय स्तरावरील गौरव प्राप्त केले आहेत. मी इथला विद्यार्थी असल्यामुळे स्थानिक आणि शैक्षणिक प्रश्नांची जाणीव होती. त्यातील अनेक प्रश्न सोडविण्यासाठी आम्ही प्रयत्न केले.

- डॉ. नितीन करमळकर, कुलगुरू