पुणे : कोरोना रुग्णांची संख्या वाढत असल्यामुळे सध्या राज्य सरकारने कडक निर्बंध आणि विकेंडला पूर्ण लॉकडाऊनची अंमलबजावणी केली आहे. तर लॉकडाऊनच्या पहिल्या दिवशी घरी राहूनच नागरीकांनी सहकार्य केले. बाहेर जाता येत नसल्यामुळे गृहिणींनी घरातच विशेष मेजवानी तयार करत तसेच कुटुंबियांसोबत वेळ घालवला. काहींनी पुस्तक वाचून तर बहुतांश लोकांनी मनोरंजनासाठी ओटीटीचा पर्याय निवडला. मागील काही महिन्यांपासून शहरात सर्व काही पूर्वी प्रमाणे सुरू झाले होते. तर शहरात विविध ठिकाणी असलेल्या बाजारपेठांमध्ये नागरिकांची रेलचेल सुद्धा वाढली होती. शनिवार आणि रविवार या दोन्ही दिवशी लोकांचे फिरण्याचे प्लॅन्स असतात. तर काही परिवारासोबत हॉटेलमध्ये जाण्याचे नियोजन करतात. मात्र सध्या लॉकडाउन
असल्यामुळे नागरिकांना घरीच राहून वेळ घालवावा लागत आहे.

हे वाचा - पुण्यावर मोदी सरकारची अवकृपा; लशीचे डोस दिलेच नाहीत!

"माझे पती बँकेत कामाला आहेत. दररोज ते कामावर जात असल्यामुळे आम्ही शनिवारी आणि रविवारी मुलांना घेऊन बाहेर फिरण्यासाठी जात होतो. मात्र आता विकेंडला लॉकडाऊन असल्यामुळे आम्ही घरीच आहोत. त्यात मुलांना कंटाळा येऊ नये म्हणून मुलांसोबत विविध खेळ खेळत आहोत."
- तृप्ती पाटील, गृहिणी

"आता कुठेतरी घरा बाहेर पडणे शक्य झाले होते. त्यात हा लॉकडाउन पुन्हा लावल्यामुळे आता बाहेर पडणे शक्य नाही. पुन्हा गेल्या वर्षीप्रमाणे घरातच राहण्याची वेळ आली आहे. त्यामुळे वेबसिरीज, चित्रपट अश्या अनेक गोष्टी पाहून मन रमविण्याचा प्रयत्न करत आहे."
- अजित सिंग

कोरोनाग्रस्त पतीचा घरातच मृत्यू; बेशुध्द पत्नीसाठी 3 तासांनी आली अ‍ॅम्ब्युलन्स

असा होता नागरिकांचा विकेंड लॉकडाऊन
- कुटुंबातील अत्यावश्यक सेवेतील सदस्य सर्व खबरदारी घेत घराबाहेर पडले
- येणाऱ्या सणानिमित्त घरातील स्वच्छतेला दिले प्राधान्य 
- मनोरंजनासाठी ओटीटी, टीव्ही, समाज माध्यमांचा वापर
- लहान मुलांनी पालकांसमवेत घरातच राहून काही खेळ खेळले
- ज्येष्ठांनी विविध पुरवणींचे केले वाचन
- पुस्तक वाचनाला दिले प्राधान्य