इंदापूर : कोरोना महामारीचे निर्बंध सैल झाल्यानंतर इंदापूर प्रशासकीय भवन शेजारी उभारण्यात आलेल्या नगरपरिषदेच्या आकर्षक वीरश्री मालोजीराजे भोसले भवन मधील छत्रपती शिवाजीराजे सभागृहात झालेल्या पहिल्या ऑफलाईन सर्वसाधारण सभेत विक्रमी १२३ विषय सर्वानुमते मंजुर झाल्याची माहिती पीठासन अधिकारी तथा नगराध्यक्षा अंकिता मुकुंद शहा यांनी दिली. यावेळी नगरपरिषद मुख्याधिकारी रामराजे कापरे, उपनगराध्यक्ष धनंजय पाटील, गटनेते कैलास कदम, विरोधी पक्ष नेता पोपट शिंदे,सर्व नगरसेवक ,नगरसेविका, प्रशासकीय अधिकारी वर्षा क्षीरसागर, इंदापूर नगरपरिषदेचे सर्व विभाग प्रमुख अधिकारी व कर्मचारी उपस्थित होते.

गेले दीड वर्षापासून कोरोना महामारीचा फैलाव शहरात होऊ नये म्हणून नगरपरिषद नगराध्यक्ष, सर्व नगरसेवक, अधिकारी व कर्मचारी यांनी नियोजन बद्ध प्रयत्न केल्याने सुरवातीस शहरात एकही रुग्ण नव्हता. मात्र शासनाने मुंबई, पुणे येथील नागरिकांना मूळ गावी परतण्यास परवानगी दिल्यानंतर शहरात या महामारीचा फैलाव झाला. मात्र परिस्थिती नियंत्रणात राहिली. मात्र या काळात मरण पावलेल्या नागरिकांना श्रद्धांजली अर्पणकरून कामकाज सुरू करण्यात आले. ऑनलाईन ऐवजी ऑफलाईन सभा झाल्याने सभेत उत्साह दिसून आला. मात्र सभेत सामाजिक अंतर पाळण्यात आले.

नगराध्यक्षा सौ.अंकिता शहा यांनी शहर स्वच्छ, सुंदर व हरित करण्यासाठी सर्वांनी एकत्र प्रयत्न करण्याचे आवाहन केले. त्यास सर्वांनी उस्फुर्त प्रतिसाद दिल्याने सर्व विषय मंजूर झाले. इंदापूर नगरपरिषदेच्या जुन्या इमारतीतील सभागृह अपुरे पडत होते मात्र नगराध्यक्षा सौ. शहा यांनी नुतन सुसज्ज सभागृहात ही सभा घेण्याचा निर्णय प्रशस्त ठरल्याचे सर्व मंजूर विषयावरून दिसून येते. सभेचे कामकाज सभाअधिक्षक गजानन पुंडे यांनी चालविले.